Градоначалникот на Куманово Максим Димитриевски повторно апелира до централната власт да се ограничат влезот и излезот од градот пред состојбата со коронавирусот да излезе од контрола.
Реклама
Куманово денеска се израмни со Дебар по бројот на заразени од новиот коронавирус, откако во последното деноноќие бројот на евидентирани случаи порасна за 23. Меѓу последните жртви на опасниот вирус е и еден 45-годишен кумановец. Но, за разлика од Дебар каде беше прогласена кризна состојба по откривањето на првите случаи уште на 13 март, во сто илјадната општина на северот на земјата, таква мерка не е на повидок.
„Остануваме на барањето да се затвори градот, и во него да се влегува и излегува само со нужна потреба“, вели за ДВ, градоначалникот Максим Димитриевски. Тој објаснува дека околу мерката постои согласност и во општинскиот кризен штаб, но дека централната власт засега не ја прифаќа. Министерот за здравство Венко Филипче денеска изјави дека не може да се зборува за „драматично зголемување“ на бројот на заразените од коронавирус во Куманово врз основа на денешното, еднодневно, зголемување на откриените случаи.
„Свесни сме за барањата кои што пристигнуваат од повеќе општини. Ние одлуките ги носиме врз основа на проценка на епидемиолозите“, рече Филипче.
Според Димитриевски, и проценката на градските власти е правена врз основа на оценки на локалните епидемиолози. Тој предлага веднаш да се започне со лоцирање на жаришта на заразата во градот и да се изврши масовно тестирање на граѓаните. „Градот треба да се затвори затоа што има многу луѓе кои непотребно влегуваат и се шири заразата“, вели Димитриевски.
Вкупниот број на заразени досега е 47 луѓе.
„Бројките покажуваат дека бројот на заболени расте, што значи интенција на ширење на епидемијата. Се надевам дека нема да дојдеме до посериозна состојба и таа да излезе од контрола“, вели Димитриевски. Општинските власти, вели тој, ги преземаат сите неопходни мерки во делот на превентивно делување и дезинфекција на градот, набројувајќи ги мерките како укинувањето и намалувањето на градскиот превоз и затворањето на градскиот пазар.
Во Куманово засега 120 лица се во изолација со добиено решение, а 360 луѓе се во самоизолација.
Димитриевски вели дека паралелно се работи и на зголемување на свеста на граѓаните и строго се контролираат владините мерки за дистанцирање и избегнување контакт, особено откако било забележано дека во некои банки и институции тие не се почитуваат.
Според последната анализа на Институтот за јавно здравје (30.03.2020), само Скопје и Дебар во Северна Македонија беа градови кои влегуваа во четвртата фаза на широко-распространета трансмисија во заедницата на коронавирусот. Сите останати градови каде беше откриен вирусот се вбројуваа во фаза 2 со спорадични случаи.
И Советот за безбедност кој заседаваше попладнево заклучи дека нема потреба од дополнителни мерки на територијата на целата држава.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.