Владата одлучи целосно да го изолира Куманово претстојниот викенд откако таму почна засилено да расте бројот на заразени од коронавирусот. Критично е и во тамошната болница. Вкупниот број заразени достигна 430 луѓе.
Фотографија: Petr Stojanovski
Реклама
Кумановци викендот ќе го минат во целосна изолација откако во изминатото деноноќие таму беа регистрирани најголем број новозаразени од коронавирусот. Полицискиот час во Куманово кој започна вечерва во 21 часот ќе трае до понеделник во 5 часот наутро, додека во работните денови следната седмица ќе започнува во 16 часот. Критично е и во тамошната болница каде 11 членови на медицинскиот персонал се заразиле со Ковид-19.
„Во кумановската болница има 11 потврдени случаи позитивни на коронавирусот. Оваа бројка во овој момент ја компромитира работата на Инфективното одделение, затоа што и претходно имаше дијагностицирани“, изјави министерот за здравство Венко Филипче. Тој информира дека по еден доктор од Скопје и од Штип се упатени во Куманово во следните денови ќе ја организираат и одржуваат работата на инфективното одделени во кумановската болница. Со оглед на тоа што се очекуваат резултатите од тестовите и на други лекари и технички персонал, ќе се реорганизира работата и во другите одделенија на болницата.
Медицински техничар позитивен на коронавирус е откриен и на Инфективната клиника во Скопје.
Од 46 нови случаи на коронавирусот во изминатите 24 часа, 23 се од Куманово, а 13 од Скопје. Двете нови жртви на вирусот се 68-годишен пациент од Тетово кој се лекувал на клиниката во Скопје од 29 март и пациент од Куманово, на возраст од 70 години. Три лица се излекувале од коронавирусот. На Инфективната клиника се хоспитализирани 67 пациенти од кои 10 имаат тешка форма на манифестација на болеста. Бројот на заразени од коронавирус во земјата достигна 430 случаи.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.
