Припадниците на германскиот контигент на КФОР дополнително ги засилија барикадите од сите страни на преминот на косовско-српската граница.

Во меѓувреме, претставници на косовската влада го одбија предлогот на официјален Белград за дијалог за регулирање на функционирањето на премините Јариње и Брњак.

Шефот на косовскиот тим во дијалогот со Белград, Едита Тахири изјави за „Коха диторе“ дека функционирањето на премините е внатрешна работа на Косово. Таа ги повика официјалните лица во Белград да го почитуваат договорот за царински печати постигнат на 2 септември во Брисел и да не трошат време во барање дијалог за функционирање на граничните премини.

Шефот на српскиот преговарачки тим во дијалогот со Приштина, Борислав Стефановиќ, пак, оцени денеска дека северот на Косово е ограничен простор под голем притисок и дека постојано постои можност да дојде до дополнителни проблеми. Белград инсистира на дијалог, а не на еднострани потези, кои би воделе кон конфронтација.

Србите во северно Косово и натаму остануваат на барикадите.

Сите патишта кои од северот на Косово водат кон централна Србија и натаму се блокирани и не им се дозволува на припадници на Еулекс, КФОР и албански полицајци и цариници да се движат низ нив.

Според медиумски извештаи, Србите на неколку места ги забетонирале барикадите и истурале дополнителни количества песок за да оневозможат било какво движење.

Германските медиуми јавуваат дека на меѓународните трупи во Косово им пристигнале две оклопни возила од типот „Дакс“ кои ќе се користат за расчистување на барикадите. Кон почетокот на октомври во земјата треба да бидат испорачани и два водени топа, тврди „Франкфуртер алгемајне цајтунг“.

Автор: ЖА/БГ/бета/миа/дв

Редактор: Жана Ацеска