Левичарот Лопез Обрадор е нов мексикански претседател
ЖА / агенции
2 јули 2018
Според нецелосните резултати од претседателските избори, Лопез Обрадор освоил преку 53 проценти од гласовите. Актуелниот претседател Пења Нието веќе му честиташе на својот наследник на функцијата.
Фотографија: Getty Images/AFP/A. Estrella
Реклама
64-годишниот Андре Мануел Лопез Обрадор успеа во својот трет обид, освојувајќи ги со големо мнозинство претседателските избори во Мексико. Ова е историски ден, изјави тој на прославата по повод победата во центарот на мексиканскиот главен град.
Своите конкуренти за највисоката државна функција Обрадор ги остави далеку зад себе, според податоците од изборната комисија, кандидатот на владејачката партија ПРИ, Антонио Меаде освоил меѓу 15,7 и 16,3 проценти, а Рикардо Анаја од Партијата на националната акција освоил меѓу 22,1 и 22,8 проценти од гласовите. Актуелниот мексикански претседател Енрике Нието му ја честитал веќе победата на Обрадор, кој е познат и под кратенката АМЛО.
Лопез Обрадор ќе биде првиот левичарски претседател во втората по големина латиноамериканска економска сила по децении. По победата, тој најави дека за него во фокусот ќе бидат социјално запоставените слоеви од населениието, но нема да има експропријација и ќе се почитува претприемачката слобода. Освен тоа, Мексико ќе ја задржи финансиската дисциплина. Меѓутоа, Обрадор ги повтори своите изборни ветувања за проверка на договорите склучени од досегашната влада во енергетскиот сектор. Борбата против корупцијата и против кривичниот имунитет за новата власт ќе имаат приоритет. Новиот претседател функцијата ќе ја преземе во декември.
Американскиот претседател Доналд Трамп преку Твитер му ја честиташе победата на Обрадор. „Ме радува идната соработка. Постојат многу нешта од кои САД и Мексико можат да профитираат“, напиша Трамп. Боливискиот социјалистички претседател Ево Моралес исто така испрати честитки преку Твитер: „Сугурни сме дека неговата влада ќе отвори нова страница во латиноамериканската гордост и суверенитет.“
Право на глас на претседателските избори во Мексико имаа 89 милиони луѓе. Според првичните проценки, излезноста била околу 61 процент. Изборната борба беше во сенка на убиството на бројни политичари, кои станаа жртви на озлогласените нарко-банди. Полициски извори велат дека се убиени најмалку 145 политичари, а на самиот изборен ден беше убиена активистка на Работничката партија.
Граница САД-Мексико: Бетон наместо челик
Ѕидот на границата со Мексико ќе се гради. Американскиот претседател Доналд Трамп потпиша соодветен декрет. На делови од границата веќе има ограда. Дали сега челикот ќе биде заменет со бетон?
Фотографија: Reuters/J. L. Gonzalez
Трамп има искуство со градење
„На нашата јужна граница ќе изградам голем ѕид. Никој не гради ѕидови подобро од мене и за тој ѕид ќе плати и Мексико.“ Тоа американскиот претседател Доналд Трамп го изјави во текот на кампањата. Досега тој градеше пред сѐ висококатници и хотели. Ѕидот на границата е на прво место на неговиот план од 10 точки во делот на политиката на доселување.
Фотографија: picture-alliance/AP Photo/C. Torres
Крај кој завршува „нигде-никаде“
Границата меѓу САД и Мексико е долга околу 3.200 километри. Од нив со жица се обезбедени околу 1.100 километри. Границата минува низ четири американски и шест мексикански сојузни држави, минува низ пустина и големи градови. Поради лошата пристапност, еден мал дел од границата во Њу Мексико е отворен. На други места пак патролираат службеници за заштити на границата.
Фотографија: Reuters/M. Blake
Несовладлив челичен џин
Бројот на илегални доселеници во САД се проценува на околу 350.000 годишно. Голем дел од нив доаѓаат од Мексико. Дел од доселениците од Мексико се толерираат. Од друга страна, мексиканските семејства не добиваат виза. Доселениците си посакуваат подобар живот, работа и повеќе пари за своите семејства.
Фотографија: picture-alliance/dpa/A. Zepeda
Само мал допир
Семејствата живеат разделени со ограда. Прегратка не е можна. Во најдобар случај низ челичните шипки може да се протне рака. Ако Доналд Трамп го оствари најавеното, тогаш наместо челик овде ќе има бетон. Тогаш и мал допир нема да биде можен.
Фотографија: picture-alliance/ZumaPress/J. West
Од изолација до предрасуди
„Кога Мексико праќа луѓе, тогаш не ги испраќа најдобрите“, рече Трамп во текот на кампањата. „Испраќа луѓе кои прават многу проблеми. Тие носат дрога, злосторства, силувачи. Некои, би рекол, се и добри луѓе.“ Трамп сака да ги протера илегалните доселеници, барем оние кои се со криминално досие. Сепак, и покрај заканите, многу Мексиканци не се откажуваат од своите планови за бегство во САД.
Фотографија: picture-alliance/AP Photo/G. Bull
Пустина, граница и назад
За некои Мексиканци сонот завршува на границата. Тие завршуваат в затвор. Други за илегално минување преку границата плаќаат со својот живот. Медиумите критикуваат дека безбедносните сили пукаат преку границата. Дури во 2015 година за тоа првпат е обвинет припадник на американската погранична служба.
Фотографија: Reuters/D.A. Garcia
Со сачмарка против непожелните гости
Џим Чилтон, американски фармер, во патрола низ својот имот. Неговата фарма на површина од 200.000 квадратни метри на југоистокот од Аризона граничи директно со Мексико. Помеѓу има само бодликава жица. Чилтон се смета себеси лично одговорен за безбедноста и одвреме-навреме посега по сачмарката.
Фотографија: Getty Images/AFP/F.J. Brown
Чуден крај
„Тортиља ѕид“ е потценувачкиот назив на 22,5 километри долгиот дел од границата меѓу Отеј Меса Бордер Кросинг во Сан Диего (Калифорнија) и Пацификот. Оградата завршува во водата. За да се побегне на другата страна е доволно само да се исплива околу оградата.
