Британската влада денеска ќе организира трето гласање за планот на Тереза Меј за Брегзит- но без политичката декларација. Спикерот на парламентот го одобри гласањето, но прашање е дали Владата има гласови?
Фотографија: Reuters/T. Melville
Реклама
Барањето на британската премиерка Тереза Меј да се одржи и трето гласање за нејзиниот план за излегување од ЕУ е одобрен. Спикерот на парламентот, Џон Берков прифати изјаснување за договорот за Брегзит, но под услов во него да ја нема политичката декларација која се однесува на идните односи меѓу Обединетото Кралство и ЕУ.
Владината претставничка во парламентот Андреа Лидсом изјави дека денешното гласање не може да се смета за сеопфатно во однос на целиот договор за Брегзит.
Опозицискиот лидер Џереми Корбин вели дека неговата Лабуристичка партија нема да гласа за договорот, опишувајќи го како „најслепиот од сите слепи Брегзити“. Клучната северноирска партија од која зависи мнозинството на Меј најави дека ќе гласа против договорот.
Британскиот парламент досега на двапати го одби планот на Меј, но исто така не успеа да изнајде ни алтернативно решение.
До каде е Брегзит во моментов?
- ЕУ се согласи да го одложи Брегзит до 22 мај доколку договорот биде одобрен оваа недела.
- Доколку договорот не помине неделава, Британија ќе мора да учествува на европските избори како услов за пролонгирање на рокот по 12 април.
- Изгласување на договорот без политичката декларација ќе ги задоволи барањата на Европскиот совет
- За целосна ратификација на договорот ќе биде потребно натамошно гласање во британскиот парламент.
Меј во небрано
За да го протурка договорот во парламентот Тереза Меј ќе мора да обезбеди најмалку уште 75 пратеници. Меј се надева на поголема поддршка во сопствената партија, но се чини дека отпорот таму не се намалува.
Кога парламентот гласаше за алтернативите за Брегзит во средата, 93 пратеници на конзервативците гласаа против одложување на Брегзит по 29 март. Но, дури 157 конзервативци гласаа потврдно на прашањето дали да се напушти ЕУ со или без договор.
Најмалку 20 конзервативци во меѓувреме рекоа дека ќе го поддржат договорот, но 15 и натаму се остро против, што значи дека Меј тешко ќе добие мнозинство.
Што се однесува до алтернативите, доколку се земе предвид гласањето в среда, најголема, иако не и апсолутна, поддршка доби идејата за останување во царинска унија со ЕУ. 264 пратеници гласаа За, а 272 Против. За одржување втор референдум гласаа 268 пратеници, но 295 беа против.
Брегзит или не: Зошто ѝ покрај тоа ги сакаме Британците
Британскиот парламент го отвори договорот за Брегзит на премиерката Меј. Сега сѐ поизвесен е „болен развод“ со ЕУ. Според многу Европејци, тоа е целосно непотребно. Изјава на љубов до Британците во десет слики.
Фотографија: Getty Images/Stuart C. Wilson/Universal Pictures Home Entertainment
Го сакаме кралското семејство!
Никој не седел толку долго на престолот, како кралицата Елизабета Втора. Од 1952 година таа е кралица на Британците и се залага за дисциплина, стабилност и традиција. Вообичаено два чекора зад неа, големата љубов на нејзиниот живот: сопругот, принцот Филип. Оваа година таа го слави својот 93-ти роденден, а тој има 98 години.
Фотографија: Getty Images/AFP/B. Stansall
Сакаме поп музика од Велика Британија
Тие се едноставно легендарни - Ролинг Стоунс: Мик Џегер, Чарли Вотс, Кит Ричардс и Рон Вуд. На 24 март 2016 година, култниот бенд имаше концерт во Хавана, Куба, испишувајќи музичка историја.
Тауер бриџ во Лондон: од 1894 година, мостот во центарот на британскиот главен град е едно од најпрочуените знаменитости на метрополата. Лондон е една од најпопуларните туристички дестинации во Европа, со повеќе од 30 милиони туристи годишно.
Фотографија: picture-alliance/dpa/J. Büttner
Ги сакаме хероите од нивните книги
Авантурите на ученикот за волшебник Хари Потер од Џоан К. Роулинг воодушевуваат деца ширум светот. На сликата е прикажан Хари Потер, кој го игра Даниел Редклиф, во својата втора година на обука во Хогвортс, на училиштето за магии и волшебништво.
Фотографија: picture-alliance/dpa/dpa-Film Warner
Ги сакаме убавите британски модели
Наоми Кемпбел е клучен дел од меѓународниот моден бизнис околу три децении. Родена во Лондон, таа беше првиот црномурест модел кој се појави на насловната страна на францускиот Вог и ѝ припаѓаше на генерацијата на супермодели во 1990-тите.
Фотографија: DW
Го сакаме британскиот хумор
Ретко кој ги растегнува мускулите за смеење толку многу како Роуан Аткинсон, алијас Мистер Бин. Истоимената серија-комедија беше оригинално прикажувана од 1989 до 1995 година и ужива култен статус.
Фотографија: Getty Images/Stuart C. Wilson/Universal Pictures Home Entertainment
Ги сакаме нивните извонредни градини и паркови
Градините Кју во југозападниот дел на британскиот главен град Лондон се меѓу најстарите ботанички градини во светот. Британците се познати по „зелениот палец" и се сметаат за специјалисти за косење трева. Никој во Европа нема толку убави градини и паркови како Британците.
Фотографија: Reuters/T. Melville
Го сакаме нивниот стил
Не станува збор за брзина, туку за елеганција и класа. Пример за тоа се култните автомобили од Велика Британија, како што е Ролс-Ројс. Иако брендот оттогаш е купен од страна на Германците, тој останува британски класик.
Фотографија: imago/Felix Jason
Го сакаме нивниот чуден вкус
Кога станува збор за кулинарството, со сигурност има други европски земји кои се во предност. Но, ако Британците останат со нас во ЕУ, нема да се жалиме на пивото без пена и јагнето со сос од нане. Ветуваме!
Фотографија: Styko
Ја сакаме нивната традиција
Дури од нив научивме колку убаво може да биде панорамското разгледување. Црвените двокатни автобуси во Лондон се повеќе од само превозно средство. Тие сѐ уште се клучен белег на британската метропола на Темза.
