Американскиот државен секретар Џон Кери синоќа соопшти дека со авганистанскиот претседател Хамид Карзаи ги договорил условите на спогодбата за безбедност меѓу САД и Авганистан. Кери притоа нагласи дека на разговорите воопшто не било разгледувано прашањето за евентуалното американско извинување до Авганистан. Кабул, од своја страна, го објави текстот на предлог-договорот, со кој се овозможува останување на американски војници во Авганистан и по повлекувањето на силите на НАТО на крајот на 2014 година. При тоа е договорено американските војници да имаат имунитетот од судско гонење, барање на САД кое претставуваше една од главните пречки во преговорите меѓу двете земји.

„Ги договоривме условите (на спогодбата) кои ќе бидат предложени на одобрување пред Сеавганистанскиот совет на племенски старешини - Лоја џирга“, рече Кери.

Собирот на Лоја џирга започнува денеска во Кабул и ќе трае до недела. На средбата ќе учествуваат околу 2.500 претставници на авганистанското општество. Ако договорот биде одобрен, авганистанските сили ќе можат да сметаат на американската поддршка и по повлекувањето на 75.000 војници на НАТО, со што се очекува да биде спречено избувнување на насилство во земјата. Советничката за национална безбедност на американскиот претседател Барак Обама, Сузан Рајс, вчера изјави дека САД не планираат да му се извинуваат на Авганистан за „грешките“ во оваа земја или за страдањата на цивилното население.