Италијанските научници тестирале 540 кучиња и 277 мачки од домаќинства со корона-пациенти или региони многу погодени од корона, како Ломбардија. Кај 3,4% од кучињата и 3,9% од мачките се пронајдени антитела против вирусот.

Истражувањата на релативно голем број животни ја потврдуваат претпоставката дека домашните миленици може да се заразат од луѓето со САРС-КоВ-2, додека инфекција по обратен пат не е многу веројатна, зашто тестовите со земање брис од пределот на челуста, носот и грлото кај сите животни биле негативни. Тестовите врз животните биле правени во периодот од март до мај 2020 година.

Домашните миленици главно не го пренесуваат вирусот

За научниците ваквите сознанија се корисни. Томас Метенлајтер, претседател на институтот „Фридрих Лефлер“ (ФЛИ) вели дека резултатот не го изненадил: „Тоа го потврдува она што веќе го знаевме“, нагласува тој. Сепак, добро е да се има студија со толкав број домашни миленици. „Не е толку едноставно да се добијат проби (материјал за истражување, н.з.)“, вели Метенлајтер.

Студијата го потврди досегашното сознание на ФЛИ дека кучињата и мачките не играат улога во ширењето на САРС-КоВ-2. Клучен е преносот од човек на човек. „Сметаме дека по правило вирусот се пренесува од човекот на животните“, вели Метенлајтер.

Контактот на здрави лица со домашните миленици, според ФЛИ, не треба да се ограничува. Инфицираните луѓе би требало да избегнуваат контакт со домашните миленици заради сигурност.

Животните не умираат од инфекција со корона

Досега, вели Метенлајтер, нема докази дека животни починале од корона-инфекција. Дури и да се заразат, тоа не значи автоматски дека вирусот може да се размножува во телото на животното и потоа преку секретот од носот, преку кашлање или изметот да се исфрли надвор, велат од ФЛИ.

Освен тоа, како што се додава, нема укажувања дека свињи, кокошки или други домашни животни може да се инфицираат со САРС-КоВ-2. На институтот во моментов се спроведуваат тестови со различни видови животни.

Освен тоа, научниците истражуваат како вирусот стигнал на фармите за видри во Холандија и Шпанија и како се инфицирале речиси сите животни, односно дали вработените на фармите им го пренесле вирусот на животните, или пак животните го пренесле вирусот врз луѓето.

Заразата на фармите почна во април. При истражувањето, професорот Вим ван дер Поел од Универзитетот Вагинген утврди дека вирусниот геном пронајден кај видрите е сличен со оној кој циркулира кај луѓето.

„Претпоставивме дека е можно тој повторно (од животните) да се пренесува на луѓето“, вели Ван дер Поел. Тоа било случај кај најмалку двајца вработени на фармите.

Како мерка на превенција, на шпанската фарма за видри кај Ла Пуебла де Валверде по наредба на властите се убиени повеќе од 92.000 видри. Деведесет проценти од видрите биле заразени со коронавирус.

Во Холандија досега се убиени 1,1 милиони видри заразени со коронавирус, соопштија холандските власти надлежни за безбедност на продукти за потрошувачка. Во Холандија има околу 160 фарми за видри. Земјата е четврт по големина производител на крзно по Данска, Кина и Полска. Шпанија има 38 фарми за видри, од кои најголемиот дел се наоѓаат во Галиција.