Се очекува Влатко Андоновски да ја замени Џил Елис на чело на актуелните светски прваци во женски фудбал. Именувањето ќе биде објавено в понеделник во Њујорк. 43-годишниот скопјанец живее и работи во САД од 2000 година. Најпрво таму настапувал како фудбалер, а потоа кариерата ја продолжил како тренер во женскиот фудбал. Веќе има освоено две американски титули со тимот на Канзас сити, а досега го предводеше тимот на Реин од Сиетл.

Под раководство на Андоновски, САД ќе се обидат да станат првиот тим во историјата кој ги освоил Светското првенство и Олимписките игри едноподруго.

Меѓу најголемите поборници за именувањето на Андоновски беше и најдобрата светска фудбалерка Меган Рапино, која игра за тимот на Сиетл.
„Неговата тактичка флексибилност и знаење се неверојатно. Мислам дека во женската фудбалска лига дури и не можеше да покаже се што знае“, изјави Рапино.

Андоновски во кариерата има настапувано за Работнички, Вардар и Македонија Ѓ.П. Првиот меч на клупата на САД ќе му биде против Шведска на 7 ноември годинава.