Македонија и Косово се разграничуваат
17 октомври 2009![](https://static.dw.com/image/3927435_800.webp)
Косовскиот Парламент денеска во второто гласање со 81 глас „за“, три „против“ и двајца „воздржани“ го ратификуваше Договорот за физичка демаркација на границата меѓу Македонија и Косово.
Собранието на Косовопо пладенво повторно гласаше за Договорот, откако во претпладневното изјаснување го поддржаа само 67 пратеници, што не беше доволнo за негова ратификација. Според Уставот на Косово, за усвојување на меѓународните договори потребно е двотретинско мнозинство во Парламентот, кој брои 120 пратеници.
Повторното гласање беше одржано по координацијата на шефовите на пратеничките групи што ја свика претседателот на косовскиот Парламент, Јакуп Красниќи, откако првото изјаснување беше несупешно.
Се чека на македонското собрание
За ратификацијата на Договорот денеска треба да се изјасни и Собранието на Македонија. Собраниската седницата е закажана откако Владата вчера ги прифати информацијата за склучување на договорот и усогласениот текст на документот, како и Предлог законот за негова ратификација.
Со Договорот се предвидува замена на две територии, што важат за спорни. Македонија добива една нива околу Шар Планина, додека кај Скопска Црна Гора, Македонија отстапува еден поголем дел од својата територија, околу селата Дебалде и важната стратегиска кота Кодра Фур, еден дел од околу 400-500 метри квадратни, според Договорот, треба да му припаднат на Косово.
Македонија и Косово покажаа одговорност и зрелост
Според планот на Марти Ахтисари, кој е основа за уредувањето на односите на Косово, предвидено е претставници на двете земји, заедно со меѓународната канцеларија на ОН, во рок од дванаесет месеци да го решат проблемот околу границата, што настана поради протоколот што во 2001 година беше потпишан меѓу Македонија и тогашна Сојузна Република Југославија. Косово одби да го признае овој протокол, но на инсистирање на меѓународната заедница се согласи да изврши демаркација на границата со Македонија.
Постигнатиот договор меѓу Македонија и Косово за демаркација на границата го поздравија ЕУ и САД со оценка дека тоа е знак на зрелост, орговорност и меѓусебно почитување, што ќе придонесе за добрососедските односи и за регионалната стабилност.
Автор: А.Ч./Ж.А./Т.Т./миа/бета
Редактор: Трајче Тосев