Македонија- меѓу првите што прифатиле џихадисти од Сирија
9 август 2018
Најтиражниот германски весник Билд пишува дека Македонија е првата земја која се согласила да прифати враќање на свои државјани кои се бореле на страна на Исламската држава во Сирија и Ирак.
Заробени борци на Исламската држава во Рака, СиријаФотографија: Reuters/G. Tomasevic
Реклама
САД започнале со враќање на повеќе заробени борци на ткн. Исламска држава од северна Сирија во нивните матични земји, пишува денеска Билд. Први земји кои прифатиле враќање на нивни државјани се Македонија и Казахстан.
Се работи за стотици терористи кои им се предале на милициите на Курдите (ИПГ) по освојувањето на самопрогласениот главен град на Исламската држава, Рака во есента 2017 година. Курдската милиција со месеци бара од САД да се погрижат за враќање на заробениците во нивните матични држави затоа што тие се дополнителен товар за нејзините ресурси: ИПГ мора да се грижи за да ги прехрани, но и да ги обезбедува.
Борци на курдската милиција во ослободената РакаФотографија: picture-alliance/dpa/S. Suna
Но, со исклучок на Русија и Индонезија, матичните држави досега го игнорираат проблемот со џихадистите повратници. Според информации на Билд, САД како водечка членка на анти-терористичката коалиција сега се обидуваат да извршат притисок врз сојузниците за забрзано преземање на џихадистите.
Во вторникот, САД ги префрлиле првите групи македонски и казахстански државјани од камповите на ИПГ во нивните матични земји. Во случајот на Македонија, пишува Билд, тоа е првата европска земја која прифатила враќање на нејзини државјани од северна Сирија.
Како што веќе пишувавме, во Македонија во вторникот беа вратени седум осомничени терористи кои учествувале во војните во Ирак и Сирија на страната на Исламската држава.
Исламската држава во меѓувреме контролира само уште еден мал дел од сириската територија во близина на границата со Ирак. Таму се водат жестоки битки со курдските борци. Според Билд, прашање е откако ќе заврши и таа битка што ќе се случува со големиот број заробени борци на Исламската држава.
Што всушност претставува „Исламска држава“?
„Исламска држава“, покрај разорувањата во Ирак и Сирија, во вестите често се наоѓа и поради нејзината бруталност. Што е ИД и колку е моќна? Во продолжение ви претставуваме одговори на најчесто поставуваните прашања.
Што е „Исламска држава“?
Се смета дека „Исламска држава“ е фракција од терористичката организација Ал Каеда, т.е. сунитска милитантна група, за која се верува дека е формирана како одговор на недовербата и фрустрациите од неуспешното владеење на владите во Сирија и Ирак. На нивното знаме пишува „Мухамед е пророкот на Бог“ и „Нема друг бог освен Алах“ - фрази со кои се согласуваат сите муслимани, не само „ИД“.
Фотографија: AP
Каде е активна „Исламска држава“
Целта на „Исламска држава“ е формирање на „калифат“ - држава каде се почитуваат традиционалните вредности на исламот и шеријатското право. Поради нестабилноста на регионите во Сирија и Ирак, „Исламска држава“ успеа да освои и да стави под своја контрола тероитории во двете држави.
Што ја прави „Исламска држава“ различна?
Клучна разлика е бруталноста на „Исламска држава“ со која се влева страв кај противниците и цивилите - преку егзекуцијата со обезглавување и бруталното насилство. Лидерите на „ИД“ велат дека владеат со регионите кои ги освојуваат. Експертот за Средниот Исток, Шади Хамид за ПБС изјави: „Тие нудат социјални услуги. Управуваат со локалната власт. Обезбедуваат минимално ниво на право и поредок“.
Фотографија: gebphotography - Fotolia.com
„ИД“ во однос на останатите терористички организации?
„ИД“ е активна во Сирија и Ирак, но нигериската терористичка организација Боко Харам неодамна ја изрази својата поддршка. Тоа е како натпревар во суровост: додека Боко Харам е одговорна за 13.000 смртни случаи, „ИД“ е одговорна за најмалку 24.000 повредени или убиени. Ал Каеда се дистанцираше од „ИД“, а една од нејзините фракции наречена Нусра Фронт се бори против „ИД“.
Фотографија: Getty Images/A. Katib
Кои се следбениците на „Исламска држава“?
Нешто по кое се разликува „ИД“ се нејзините следбеници. Повеќе од 20.000 странски борци се придружија на групата, од кои повеќе од 4.000 доаѓаат од западна Европа и северна Америка. На сликата се прикажани државите од каде што потекнувааат најголемиот дел на борците. Најголем број борци - споредено со вкупниот број на жители на земјите, доаѓаат од мали земји како Шведска и Белгија.
Што преземаат западните влади против „Исламска држава“?
Од август 2014 година, коалиција предводена од САД спроведува воздушни напади против цели на „ИД“ во Сирија (1.422 напади) и Ирак (2.242 напади). Некои влади исто така беа активни во рамките на нивните држави: Германија ќе процесуира најмалку 30 осомничени милитанти кои се вратиле од Сирија, додека Саудиска Арабија уапси 93 осомничени милитанти во април 2015 година.
