Од информациите кои ги добивме од седиштето на Европската унија дознаваме дека всушност Грција одамна го има заштитено и македонското географско потекло како исклучиво нејзино, а во службениот весник на ЕУ на 15 септември 1989-та е заштитен и терминот „Македонија“ како грчки. Бидејќи Грција е земја-членка на ЕУ, најприродно таа имала предност во заштитата на македонското потекло при извозот кон европсиот пазар, коментираат дипломатите во Брисел. Според истите извори, тоа што досега Македонија сепак извезувала „македонско“ вино на пазарот на Европската унија се должи на фактот што најверојатно досега станувало збор за нискоквалитетно ниво, па така никој не гледал потреба да реагира, затоа и македонските произведувачи не забележале дека постои ваква забрана.

Македонија, всушност, го прекршувала правилото на ЕУ

Инаку, според две регулативи на ЕК кои се однесуваат на заштитата на географското потекло во ЕУ, едната од 2007-ма, другата од 2009-та, земјите- членки имаат обврска да пријават кај европските институции штом забележат дека трета земја извезува „македонско“ вино кое не е од Грција. Токму тоа и се случило на крајот на 2009-та, кога германските власти наишле на македонско вино во германски супермаркет. Веднаш побарале од ЕК мислење за правната рамка на ова прашање, по што генералниот директорат за земјоделство на ЕК им потврдил дека „македонското“ вино во ЕУ смее да се однесува само на вино од Грција и дека ова географско потекло е заштитено.

Македонија ова правило не го прифаќа, но штом ќе стане членка на ЕУ, регулативите кои се однесуваат на македонското географско потекло ќе мора да ги преточи во национално законодавство. Се поставува сега прашањето зошто министерот за земјоделство Љупчо Димовски за медиумите изјави дека Македонија има рок до март 2011-та да ги смени етикетите. Дипломати од ЕК за Дојче веле велат дека таков рок воопшто не постои, дека Македонија одамна требала да ги смени сите етикети и дека ова правило не е ништо ново за пазарот на ЕУ. Всушност, велат во ЕК, Македонија досега ги прекршувала европските регулативи.

Автор: Тања Милевска

Редактор: Жана Ацеска