По повод 17 декември, Меѓународен ден за стоп на насилството врз сексуалните работници, по 14-ти пат во Скопје се одржа марш на црвените чадори. Маршот започна од улицата „Македонија“, а учесниците кои носеа транспарент со натпис „Декриминализација, кога?“, побараа итна и неодложна декриминализација на сексуалната работа во земјата и признавање на човековите и работничките права.

„Бараме декриминализација на сексуалната работа, затоа што тоа значи почитување на човековите права и достоинство и затоа што помага за заштита од насилство и злоупотреба“, порачаа сексуалните работници. Со декриминализација, според нив, ќе се ограничи полициската злоупотреба и насилство, ќе се подобри пристапот до здравствени услуги, ќе се намалува ризикот од ХИВ и сексуално преносливи инфекции и ќе се унапредат безбедните работни услови.

Маршот го организираше Граѓанската иницијатива за заштита, промоција и унапредување на правата на сексуалните работници „Стар-Стар“. Според податоците на невладините организации, во Северна Македонија има околу 200 сексуални работници.