Германската канцеларка Ангела Меркел беше вакцинирана во Берлин. Таа денеска ја прими првата доза на вакцината на АстраЗенека. Го стори тоа тивко и мирно, но испрати силна порака.
Фотографија: Jens Krick/Flashpic/picture alliance
Реклама
„Им благодарам на сите кои се ангажираат во кампањата за вакцинација, и на сите кои се вакцинираат“, изјавила канцеларката, како што пренесе најзиниот портпарол Штефен Зајберт.
Без фотографија и со неколку редови текст на Твитер: за разлика од многу светски политички лидери, германската канцеларка Ангела Меркел не направи голема врева околу вакцинирањето со вакцината на шведско-британскиот производител АстраЗенека.
66-годишната канцеларка вакцината ја примила во центарот за вакцинација на поранешниот аеродром во Берлин- Темпелхоф, каде во моментот исклучиво се вакцинира со контроверзната вакцина. Во моментов, таму може да се вакцинираат околу 3.000 луѓе на ден - а денеска меѓу нив беше и Ангела Меркел.
„Ќе се вакцинирам кога ќе дојдам на ред“
„Кога ќе дојдам на ред, ќе се вакцинирам, и со АстраЗенека.“ Канцеларката Меркел го повторуваше ова повеќепати во изминатите недели, знаејќи колку токму во Германија редоследот за вакцинирање е чувствителна тема. Политичарите во Германија, во секој случај, не навалуваат да се вакцинираат, дури иако немаат формални забелешки за вакцинирањето, како и канцеларката.
Штајнмајер - имам доверба во вакцините
„Имам доверба во секоја вакцина која е одобрена во Германија. Вакцинирањето е одлучувачки чекор за излез од пандемијата. Искористете ја можноста и придружете се“, апелираше германскиот претседател, Франк-Валтер Штајнмајер, во почетокот на април во едно соопштение.
Премиерот на сојузната покраина Баден Виртемберг, 72-годишниот Винфрид Кречман, е еден од ретките германски политичари кој дозволи да го снимаат камерите кога се вакцинираше во март. И тој ја прими вакцината на АстраЗенека и брзо соопшти дека е уверен во сигурноста и ефикасноста на серумот.
АстраЗенека за постари од 60 години
Вакцината на шведско-британскиот производител АстраЗенека на почетокот беше дозволена само за лицата под 60 години, поради тоа што немаше доволно податоци за тоа како делува вакцината на постарите од 60 години. А, потоа почнаа да пристигаат загрижувачки извештаи за церебрална тромбоза во неколку случаи, првенствено кај млади жени.
Вакцини- адути на човештвото против Ковид-19
Глобалната кампања за вакцинација против Ковид-19 зема сѐ поголем замав. Во различни земји, создадени се или на повидок се вакцини, кои сега се главно оружје на човештвото во справувањето со пандемијата.
Фотографија: Francis Dean/Dean Pictures/imago images
Бионтек/Фајзер: почеток на иРНК-револуцијата
Првата вакцина против Ковид-19, одобрена за употреба во САД и во ЕУ, беше вакцината на германските научници со турски корени Угур Шахин и неговата сопруга Озлем Туречи. Нивната фирма Бионтек од Мајнц влезе во сојуз со американскиот гигант Фајзер. Медиумите почнаа да зборуваат за „револуција“ во фармацевтската индустрија, откако е создадена првата иРНК вакцина.
Фотографија: Francis Dean/Dean Pictures/imago images
Модерна: родум од универзитетот Харвард
Американската компанија за биотехнологија Модерна е специјализирана и за РНК технологии, кои се сметаат за нов чекор во медицината. Нејзиното седиште се наоѓа во Кембриџ, Масачусетс, во близина на универзитетот Харвард, чии научници ја основаа компанијата во 2010 година. Вакцината на Модерна, создадена со финансиска поддршка од властите, беше втората корона-вакцина регистрирана во САД и во ЕУ.
Фотографија: Matthew Healey/AFP/Getty Images
АстраЗенека: „Оксфордската вакцина“
Научниците од Универзитетот Оксфорд во соработка со британско-шведската компанија АстраЗенека вршеа клинички испитувања и производство на нивната вакцина. Таа во голема мерка се користи во Велика Британија, ги исполнува условите во ЕУ и активно се користи во земјите во развој, бидејќи „вакцината од Оксфорд“ има многу ниска цена. Така, таа се произведува во Индија за локалниот пазар и за извоз.
Фотографија: Channi Anand/AP/picture alliance
Спутник V: првата одобрена вакцина во светот
Во август 2020, Русија објави дека прва во светот регистрирала вакцина против коронавирусот наречена Спутник V. Масовната вакцинација на руското население официјално започна во јануари 2021. Оваа векторска вакцина, изработена од научниците од Московскиот центар Гамалеја, се промовира на странските пазари од страна на Рускиот фонд за директни инвестиции.
Фотографија: Aizar Raldes/AFP/Getty Images
Џонсон и Џонсон: доволна е една доза
Американска корпорација Џонсон и Џонсон е еден од шесте производители на корона-вакцини со кои ЕУ склучи прелиминарни договори за снабдување. Од нејзината векторска вакцина потребна е само една доза, а не две како останатите и се чува во конвенционални фрижидери. За ЕУ оваа вакцина, која доби дозвола за употреба на 11.03. ќе ја произведува белгиската сестринска фирма на Џонсон и Џонсон - Јансен.
Фотографија: Johnson/AP/picture alliance
Синовак: тивкиот конкурент од Кина
Без многу врева и детални извештаи за клиничките испитувања, Кина разви најмалку три вакцини. Една од нив, создадена од деактивиран коронавирус, Синовак Биотек ја тестираше во неколку азиски земји, вклучувајќи ја и Индонезија, која потоа веднаш ја нарача. Да им даде пример на своите сонародници, претседателот на Индонезија, Џоко Видодо, прв се вакцинираше.
Фотографија: Laily Rachev/Biro Pers Sekretariat Presiden
Синофарм: Првата кинеска вакцина
Станува за вакцина со „деактивиран“ вирус која државната компанија ја разви во соработка со Институтот за вирологија од Вухан. Овој вид на вакцини се користи веќе со децении, со добри резултати во пракса. Вакцината која веќе се користи во Србија и во Унгарија, беше првата која доби одобрение за употреба од кинеските власти.
Американската фармацевтска компанија Новавакс објави дека нејзината вакцина е 96 процентно ефикасна против оригиналниот вирус и 86 проценти против британскиот сој. Тоа произлегува од студијата што Новавакс ја спроведуваше во Велика Британија. Вакцината може да биде одобрена за употреба во САД уште во мај, доколку властите утврдат дека податоците од Велика Британија се доволни, соопшти компанијата.
Фотографија: Justin Tallis/AFP/ Getty Images
КјурВак: Печатач за вакцини на Тесла
Втората германска иРНК вакцина, која се очекува да биде регистрирана до лето, ќе биде произведена и извезена на глобално ниво од компанијата КјурВак од Тибинген, во партнерство со концернот Баер. Но, ќе биде можно таа да се направи директно во клиниките ширум светот. Елон Маск (втор од лево) демонстрираше мобилен печатач на вакцини создаден од германската сестринска фирма Тесла Громан.
Фотографија: picture-alliance/dpa/T. Schwarz
Санофи: два неуспеха и помош за Европска унија
Француската компанија Санофи е еден од најголемите светски производители на вакцини. Но, овојпат тоа не и' успеа - двапати: ни заедничкиот развој со британската ГлаксоСмитКлајн, ниту обидот за создавање иРНК вакцина досега не дадоа резултати. За да помогне во обезбедувањето на вакцини за земјите од ЕУ, нејзината фабрика во Франкфурт на Мајна ќе произведе 125 милиони дози од вакцината на Фајзер.
Фотографија: C. Stoll/Sanofi
10 фотографии1 | 10
Сега пак, АстраЗенека во Германија се дава на лицата над 60 години. Така што, сега со оваа вакцина можат да се вакцинираат цела низа водечки политичари од оваа старосна група. Во оваа смисла канцеларката даде сигнал дека, покрај сите несигурности, и натаму верува во оваа вакцина.
Помали скандали од локални политичари
Германските водечки политичари и натаму често се вакцинираат во тишина. Сигурно и поради тоа што знаат колку брзо можат да појават дебати за тоа дали го користат своето влијание и моќ да обезбедат неоправдани привилегии.
На почетокот на вакцинацијата во декември, навистина имаше вести оти одделни локални политичари ја заобиколиле процедурата и добиле вакцини. Градоначалникот на Хале во покраината Саксонија-Анхалт е суспендиран од функцијата кога се дозна дека се вакцинирал преку ред.
САД: Вакцинација со „турбо“ брзина
02:41
This browser does not support the video element.
Поголемо медиумско внимание во другите земји
Политичките моќници во другите земји настапуваат значително поофанзивно со сопственото вакцинирање, отколку што тоа го направи Меркел во Германија. Британскиот премиер, Борис Џонсон, во март се вакцинираше во присуство на бројни претставници на седмата сила. Џонсон минатата година беше заразен со Ковид-19 поради што беше лекуван и на оделението за интензивна нега. Кога се вакцинираше рече оти речиси ништо не почувствувал. „Беше многу добро и многу брзо“, изјави тој.
Актуелниот американски претседател, Џозеф Бајден, уште не беше на оваа функција кога во декември 2020 година пред камерите се вакцинираше во една болница во Делавер. Бајден ја прими вакцината против коронавирусот на германско-американскиот производител Бионтек/Фајзер. „Ова го правам да демонстрирам дека луѓето треба да се подготват, кога ќе биде достапна вакцината. Нема ништо поради што треба да постои загриженост“, изјави тогаш Бајден.
