Германската канцеларка побара натамошен ангажман и верба во борбата против корона пандемијата, вакцинирање и тестирање. Европа треба да се потпре на сопствено производство на вакцини, рече Меркел во Бундестагот.
Реклама
Германската канцеларка Ангела Меркел ја истакна нужноста од сопствена продукција на вакцини против коронавирус во ЕУ. Важно е да се обезбеди производство на вакцини на европско тло, рече Меркел во владината изјава во германскиот Бундестаг пред самитот на ЕУ, на кој вакцините се исто така една од централните теми. Велика Британија ќе произведува за Велика Британија, САД не извезуваат вакцини, затоа, на долг рок, Европа може да се потпре само на она што ќе биде тука произведено.
„Добро е што ја имаме Европската унија"
Канцеларката повторно застана во одбрана на заедничкиот европски пат во сузбивањето на пандемијата на коронавирус. „При сите тешкотии, верувам дека во пандемијата уште еднаш се покажа колку е добро што ја имаме ЕУ“. Меркел притоа го потенцираше значењето на заедничко обезбедување и издавање дозволи за вакцините. „Заедничкото обезбедување вакцини преку ЕУ беше правилно“, рече Меркел. Посебно кога се гледа дека и при најмалите разлики во распределбата се разгоруваат бурни дискусии, не е тешко да се претпостави што би било доколку одделни членки на ЕУ би имале вакцини, а другите не. „Тоа до темел би го потресло внатрешниот пазар“, смета Меркел.
Таа ги повика германските општини да покажат поголема креативност во совладувањето на пандемијата: „На ниеден градоначалник и советник не му е ускратено да го направи она што се применува во Тибинген и во Росток“.
Двата града се сметаат за позитивни примери со нивната стратегија за сузбивање на пандемијата. Со поглед кон стратегијата на тестирање, Меркел побара поголем ангажман од сојузните покраини. Владата не може да се конфронтира со тест-инфраструктура за 40.000 училишта во земјата. Берлин радо помага, исто како и Бундесверот, но сега на потег се сојузните покраини.
Германија соочена со трет бран коронавирус
02:07
Обврски и за граѓаните и економијата
Канцеларката истовремено ги повика граѓаните да го користат правото на бесплатно тестирање: „И најдобрите понуди за тестирање се безвредни ако не се користат“.
Тестирањето претставува „мост“ на патот до моментот кога ќе се покаже ефектот од вакцинацијата. „Колку повеќе вршиме тестирања, толку помалку ќе мораме да воведуваме ограничувања“, рече Меркел. Таа ѝ се закани на економијата со воведување задолжително тестирање на вработените двапати неделно, доколку 90 проценти од претпријатијата не ја применуваат мерката доброволно. На почетокот на април владата очекува одговор од стопанството за тоа колку фирми имаат понуда на корона-тестови за своите работници. „Ако мнозински дел од германското стопанство не им понуди корона-тестови на своите вработени, ќе примениме регулаторни мерки во областа на заштитата на работно место“, порача Меркел. Владата за ова ќе одлучува на 13 април.
Меркел апелираше на натамошен ангажман и верба во борбата против корона пандемијата. Таа оптимистички порача: „Се гледа светлина на крајот на тунелот“.
Вакцини- адути на човештвото против Ковид-19
Глобалната кампања за вакцинација против Ковид-19 зема сѐ поголем замав. Во различни земји, создадени се или на повидок се вакцини, кои сега се главно оружје на човештвото во справувањето со пандемијата.
Фотографија: Francis Dean/Dean Pictures/imago images
Бионтек/Фајзер: почеток на иРНК-револуцијата
Првата вакцина против Ковид-19, одобрена за употреба во САД и во ЕУ, беше вакцината на германските научници со турски корени Угур Шахин и неговата сопруга Озлем Туречи. Нивната фирма Бионтек од Мајнц влезе во сојуз со американскиот гигант Фајзер. Медиумите почнаа да зборуваат за „револуција“ во фармацевтската индустрија, откако е создадена првата иРНК вакцина.
Фотографија: Francis Dean/Dean Pictures/imago images
Модерна: родум од универзитетот Харвард
Американската компанија за биотехнологија Модерна е специјализирана и за РНК технологии, кои се сметаат за нов чекор во медицината. Нејзиното седиште се наоѓа во Кембриџ, Масачусетс, во близина на универзитетот Харвард, чии научници ја основаа компанијата во 2010 година. Вакцината на Модерна, создадена со финансиска поддршка од властите, беше втората корона-вакцина регистрирана во САД и во ЕУ.
Фотографија: Matthew Healey/AFP/Getty Images
АстраЗенека: „Оксфордската вакцина“
Научниците од Универзитетот Оксфорд во соработка со британско-шведската компанија АстраЗенека вршеа клинички испитувања и производство на нивната вакцина. Таа во голема мерка се користи во Велика Британија, ги исполнува условите во ЕУ и активно се користи во земјите во развој, бидејќи „вакцината од Оксфорд“ има многу ниска цена. Така, таа се произведува во Индија за локалниот пазар и за извоз.
Фотографија: Channi Anand/AP/picture alliance
Спутник V: првата одобрена вакцина во светот
Во август 2020, Русија објави дека прва во светот регистрирала вакцина против коронавирусот наречена Спутник V. Масовната вакцинација на руското население официјално започна во јануари 2021. Оваа векторска вакцина, изработена од научниците од Московскиот центар Гамалеја, се промовира на странските пазари од страна на Рускиот фонд за директни инвестиции.
Фотографија: Aizar Raldes/AFP/Getty Images
Џонсон и Џонсон: доволна е една доза
Американска корпорација Џонсон и Џонсон е еден од шесте производители на корона-вакцини со кои ЕУ склучи прелиминарни договори за снабдување. Од нејзината векторска вакцина потребна е само една доза, а не две како останатите и се чува во конвенционални фрижидери. За ЕУ оваа вакцина, која доби дозвола за употреба на 11.03. ќе ја произведува белгиската сестринска фирма на Џонсон и Џонсон - Јансен.
Фотографија: Johnson/AP/picture alliance
Синовак: тивкиот конкурент од Кина
Без многу врева и детални извештаи за клиничките испитувања, Кина разви најмалку три вакцини. Една од нив, создадена од деактивиран коронавирус, Синовак Биотек ја тестираше во неколку азиски земји, вклучувајќи ја и Индонезија, која потоа веднаш ја нарача. Да им даде пример на своите сонародници, претседателот на Индонезија, Џоко Видодо, прв се вакцинираше.
Фотографија: Laily Rachev/Biro Pers Sekretariat Presiden
Синофарм: Првата кинеска вакцина
Станува за вакцина со „деактивиран“ вирус која државната компанија ја разви во соработка со Институтот за вирологија од Вухан. Овој вид на вакцини се користи веќе со децении, со добри резултати во пракса. Вакцината која веќе се користи во Србија и во Унгарија, беше првата која доби одобрение за употреба од кинеските власти.
Американската фармацевтска компанија Новавакс објави дека нејзината вакцина е 96 процентно ефикасна против оригиналниот вирус и 86 проценти против британскиот сој. Тоа произлегува од студијата што Новавакс ја спроведуваше во Велика Британија. Вакцината може да биде одобрена за употреба во САД уште во мај, доколку властите утврдат дека податоците од Велика Британија се доволни, соопшти компанијата.
Фотографија: Justin Tallis/AFP/ Getty Images
КјурВак: Печатач за вакцини на Тесла
Втората германска иРНК вакцина, која се очекува да биде регистрирана до лето, ќе биде произведена и извезена на глобално ниво од компанијата КјурВак од Тибинген, во партнерство со концернот Баер. Но, ќе биде можно таа да се направи директно во клиниките ширум светот. Елон Маск (втор од лево) демонстрираше мобилен печатач на вакцини создаден од германската сестринска фирма Тесла Громан.
Фотографија: picture-alliance/dpa/T. Schwarz
Санофи: два неуспеха и помош за Европска унија
Француската компанија Санофи е еден од најголемите светски производители на вакцини. Но, овојпат тоа не и' успеа - двапати: ни заедничкиот развој со британската ГлаксоСмитКлајн, ниту обидот за создавање иРНК вакцина досега не дадоа резултати. За да помогне во обезбедувањето на вакцини за земјите од ЕУ, нејзината фабрика во Франкфурт на Мајна ќе произведе 125 милиони дози од вакцината на Фајзер.