Меркел во Аушвиц: Се срамам од варварските злосторства
БГ/ ДПА
6 декември 2019
Ангела Меркел за првпат како канцеларка го посети поранешниот нацистички концентрационен логор Аушвиц во Полска и порача дека признавањето на злосторствата е клучен дел од германскиот идентитет.
Фотографија: Reuter/K. Pempel
Реклама
„Сеќавањето на злосторствата е одговорност која никогаш не завршува“, порача германската канцеларка Ангела Меркел за време на посетата.
„Да се биде свесен за таа одговорност е дел од нашиот национален идентитет, нашето саморазбирање како просветено и слободно општество“.
Меркел е третиот германски канцелар во историјата која го посетува местото кое стана симбол за Холокаустот.
Таа изрази „длабок срам“ за „варварските“ и „непојмливи“ злосторства во Аушвиц и во блискиот Биркенау, каде беа убиени еден милион Евреи во периодот од 1940 д0 1945 година.
„Ова место не обврзува да го сочуваме сеќавањето за тоа што се случи тука. Мора да ги запаметиме злосторствата кои тука се случија и јасно да ги дефинираме“.
„Мора јасно да се идентификуваат злосторниците. Тоа им го должиме на жртвите и на себеси“, рече Меркел.
Ангела Меркел пред влезот во АушвицФотографија: picture-alliance/dpa/R. Michael
„Аушвиц не учи дека не смееме да замижиме кон оние кои се прогонувани денеска, во време на растечки анти-семитизам и зголемени напади врз либералната демократија“.
Меркел денеска тргна по стапките на нејзините претходници, канцеларите Хелмут Шмит во 1977 и Хелмут Кол кој го посети логорот во 1989 и 1995 година. Таа досега посети повеќе поранешни концентрациони логори, и пет пати беше во Меморијалниот центар на Холокаустот Јад Вашем во Ерусалим.
Во 2008 година, таа стана првиот германски лидер кој се обратил пред израелскиот парламент.
Нејзината посета на Аушвиц се случува два месеци по нападот врз синагогата во германскиот град Хале во кој беа убиени две лица. Полициските извештаи покажуваат дека анти-семитските инциденти во Германија пораснале за 10 проценти во последната година во споредба со претходната- највисоко ниво во последната деценија.
Напади врз синагоги во Германија
Обидот за напад во Хале не е првиот. И по 1945 година антисемитизмот во Германија го покажува своето лице – во форма на напади врз индивидуи, споменици или на осум синагоги.
Фотографија: picture-alliance/dpa/Avers
Напад во Хале на Јом Кипур
Околу 80 лица на 9 октомври 2019 година беа во синагогата во Хале кога во неа се обиде да влезе напаѓач. Според податоци на полицијата, притоа биле застрелани двајца минувачи, повеќе лица се повредени. Осомничениот сторител е 27-годишен Германец со десноекстремистичка позадина. Ова не е прво антисемитски мотивирано дело по 1945.
Фотографија: Imago Images/S. Schellhorn
Бран од написи
Во декември 1959 година синагогата во Келн е мета на напади на десноекстремната партија ДРП. Двајца нејзини членови на објектот исцртаа свастики и написот „Германците бараат Евреите да си заминат“. Следуваше бран антисемитски графити низ цела земја. Сторителите се осудени. Под влијание на настаните Бундестагот донесува Закон против хушкање на народите.
Фотографија: picture-alliance/Arco Images/Joko
Подметнат пожар по многу години
Нападот врз синагогата во Либек во март 1994 година предизвика ужасеност низ цел свет. По многу децении повторно беше запалена синагога. Сторителите се четворица мажи од деснорадикалното милје, сите се подоцна осудени за делото. Следниот ден 4000 граѓани од Либек се на улица да протестираат во знак на солидарност со Евреите. Во 1995 година синагогата повторно е мета на подметнат пожар.
Фотографија: picture-alliance/dpa/J. Büttner
Каменувана старата синагога во Есен
Во октомври 2000 година над 100 Палестинци од Либан, опремени со бекатонки, ја напаѓаат старата синагога во Есен. Инцидентот се случува по демонстрации против „насилството на Блискиот Исток“. Освен еден припадник на полицијата, настанот поминува без повредени лица. Заменикот генерален претставник на Палестинците во Германија, Махмуд Аледин, јасно се дистанцира од нападот.
Фотографија: picture-alliance/B. Boensch
По делото: „Бунт на пристојните“
Со запаливи материјали и камења во октомври 2000 година еден 19-годишен Палестинец и еден 20-годишен Мароканец ја оштетија Новата синагога во Диселдорф. Нивното дело било чин на одмазда спрема Евреите и Израел. Канцеларот Шредер реагира со зборовите: „Потребен ни е бунт на пристојните (...)". Сојузната држава, покраините и невладините организации инициираат бројни акции против екстремизмот.
Фотографија: picture-alliance/dpa/R. Weihrauch
Напад врз синагога во Мајнц
Во ноќта помеѓу 30 и 31 октомври 2010 година, кусо по нејзиното отворање, е подметнат пожар во новата синагога во Мајнц. Објектот е познат по својата архитектура, односно деконструктивистичкиот проект на архитектот Мануел Херц. Се наоѓа на местото на поранешната главна синагога во Мајнц, која била запалена во 1938 година.
Тројца млади Палестинци во јули 2014 фрлаат запалив коктел во синагогата во Вупертал. Судот оцени дека немало „никаква основа“ да се констатира дека момчињата се антисемитисти. Евреите во Германија, како и странските медиуми, се шокирани. Претседателот на еврејската заедница од Вупертал вели дека пресудата била „покана за извршување други кривични дела".
Фотографија: picture-alliance/dpa/C. Seidel
Спречен напад во Берлин
На 4 октомври годинава еден маж се прекачи преку заштитната ограда кај синагогата во Берлин и извади нож. Безбедносните служби го пресретнаа и го спречија нападот. Неговиот мотив е сѐ уште нејасен. Во 1943 година синагогата во Берлин беше уништена во бомбардирањето. Руините од големата синагога се урнати во 1970 година. Истата е обновена во 1990-те.
