Меркел во Минхен им оддаде признание на Заев и Ципрас
СН/ агенции
16 февруари 2019
Германската канцеларка Ангела Меркел денеска имаше обраќање на Минхенската безбедносна конференција. Покрај за глобалните проблеми, Меркел го издвои и потенцираше успехот постигнат со Договорот од Преспа.
Фотографија: Reuters/A. Gebert
Реклама
Германската канцеларка Ангела Меркел им одаде признание на премиерите на Северна Македонија и на Грција, Зоран Заев и Алексис Ципрас, на храброста да постигнат договор и да го надминат повеќедеценискиот спор за името и со тоа да ѝ овозможат на Северна Македонија влез во НАТО.
„Во секој конфликт е можно да се пронајде решение ако се покаже храброст“, наведе канцеларката за време на обраќањето на Минхенската безбедносна конференција. Освен тоа таа истакна оти НАТО ѝ е потеребен на Европа како гаранција за безбедност, но и како столб на заеднички вредности кои ги споделуваат членките.
Фотографија: Reuters/A. Gebert
Германската канцеларка во Минхен истакна и оти укинувањето на Договорот за нуклеарните проектили од среден дострел (ИНФ) е лоша работа, но и пример како за европската безбедност одлучуваат други земји.
„Укинувањето на ИНФ е лоша вест, иако по повеќегодишното руско кршење на договорот, но интересно е оти станува збор за договор за разоружување кој е најважен за европската безбедност, а го укинаа САД и Русија“, рече Меркел во на безбедносната конференција.
Таа наведе дека разоружувањето е тема на која треба да се фокусира целиот свет и ја повика Кина и другите сили да се вклучат.
Зборувајќи за меѓузависноста, германската канцеларка наведе дека денешните меѓународни структури се настанати како последица на Втората светска војна и сега се наоѓаат под притисок.
„Денешните предизвици бараат да ги реформираме постоечките структури, но не можеме да ги уништиме“, наведе Меркел.
Договор за решавање на спорот за името
Договорот за решавање на спорот за името меѓу Македонија и Грција беше потпишан на 17 јуни 2018. Тој би требало да му стави крај на спорот кој трае четврт век. Но, до неговото конечно спроведување има уште работа.
Договорот за решавање на спорот за името во Псарадес, на грчката страна од Преспанското Езеро, го потпишаа министрите за надворешни работи Никола Димитров и Никос Коѕијас. „Горди сме затоа што избравме решение што нѐ обединува“, оцени македонскиот премиер Заев. Неговиот грчки колега Ципрас рече: „Овде сме да ги залечиме раните што ги остави времето, да отвориме пат за мир, братство и пораст“.
Фотографија: Reuters/A. Konstantinidis
Роденден
Потпис на договорот стави и долгогодишниот посредник на Обединетите Нации во спорот за името, Метју Нимиц. Потпишувањето се падна токму на неговиот 79-ти роденден. „На членовите на моето семејството им реков дека не сакам подароци за овој роденден, зашто двајца премиери ќе ми дадат еден голем подарок“, рече Нимиц на церемонијата во Псарадес.
Фотографија: Reuters/A. Konstantinidis
Вратоврска
Кога по потпишувањето на договорот требаше да се направи семејна фотографија од настанот, македонскиот премиер Зоран Заев, веројатно не сакајќи да се разликува од Алексис Ципрас, кој е познат по тоа што не носи вратоврски, ја извади својата црвена вратоврска и му ја подари на својот грчки колега. Тоа беше поздравено со широки насмевки и громогласен аплауз од присутните.
Фотографија: Reuters/A. Konstantinidis
Договорот зачинет со македонска храна и вино
Официјалната средба по потпишувањето во Псарадес се префрли на македонскиот брег на Преспанското Езеро. Двете делегации до Отешево стигнаа по воден пат, со чамци. Во Отешево се водеа билатерални разговори и имаше свечен ручек. На заедничкиот ручек присуствуваа и претставниците на Европската Унија и Обединетите Нации – Федерика Могерини, Јоханес Хан, Метју Нимиц и Розмари Ди Карло.
Фотографија: Reuters/A. Konstantinidis
Протести во Скопје
Потпишувањето на договорот за решавање на спорот за името предизвика протести во Македонија. Демонстрантите пред Собранието на 17.06.2018 се судрија со полицијата. Во безредијата имаше повредени и приведени лица. Според полициски наводи, има неколку повредени полицајци, како и над 25 уапсени учесници на протестите. Официјален организатор на протестите нема.
Во Грција исто така се протестира. Противниците на договорот за решавање на спорот за името во Атина за време на расправата за доверба на владата на Ципрас се судрија со полицијата пред парламентарната зграда (фото: 16.06.2018). Полицијата мораше да употреби солзавец за да ја разбие толпата која се обиде да влезе во парламентарната зграда. Владата го преживеа гласањето.
Фотографија: Reuters/C. Baltas
Уште многу работа
Ставањето потпис на Конечната спогодба за решавање на спорот за името е само еден од чекорите кои следуваат во наредните месеци до конечно решение. Следува ратификација во македонското Собрание, референдум на кој македонските граѓани ќе се изјаснат за договорот, а потоа и ратификација во грчкиот парламент.
