Неколку месеци пред заминувањето во политичка пензија, германската канцеларка Ангела Меркел стравува дека луѓето ќе мислат оти не работела доволно напорно. Прашана што не би сакала да биде запишано за неа во историските учебници, за време на онлајн форумот на јавниот сервис ВДР, Меркел одговори: „Дека сум била мрзлива“.
Коментарот на Меркел беше изречен со иронична насмевка, како контрапункт на нејзината репутација дека е сосема спротивно од мрзлива. 66-годишната Меркел е позната по пренатрупаниот распоред и еднаш самата кажа дека складира сон како што камилите складираат вода.
Во 2015 година, нејзиниот работен календар стана вест сам по себе по состаноците во Киев, Москва, Вашингтон, Отава и Минск во рок од една недела, кои кулминираа со 17 часовни преговори за прекин на огнот.

Неодамна, Меркел ја примени својата добро позната тактика на заморување на соговорниците со целовечерни преговори во врска со Европскиот фонд за спасување, а подоцна и за мерките против коронавирусот со премиерите на германските покраини.

Прашана минатата година за плановите за пензионирање и кога планира да олабави со работа, Меркел рече: „Не сум размислувала за тоа“.
„Засега ќе продолжам да работам и на крајот работите ќе си дојдат на свое место. Оптимист сум дека ќе смислам нешто“.