Мерките попуштаат, но границите се уште тешко проодни
БГ
22 јуни 2020
Комисијата за заразни болести препорачува отворање на казина и автомат-клубови, но се уште нема одлука за обврската да се оди во самоизолација по влез во земјата. Здравствените работници се преморени, вели Филипче.
Фотографија: Regierung Nordmazedonien
Реклама
Министерот за здравство Венко Филипче не сака да прогнозира каков тек ќе земе епидемијата на коронавирусот во земјата, откако денешните бројки за првпат по неколку недели покажаа пад на бројот на новозаразени. Во изминатото деноноќие регистрирани се 90 нови случаи, од кои најголемиот дел- 36 повторно во Скопје, но направени се далеку помал број тестови -665 во однос на претходните денови- што е вообичаено за деновиве на викендот кога приватните лаборатории не тестираат.
„Бројот на новодијагностицирани во Скопје опаѓа, но како и повеќе пати претходно, со резерва ќе кажам дека ова така ќе продолжи, затоа што има повеќе фактори кои влијаат. Викендите со недели наназад прават промени. Битно е дека добро се прави следење на контактите“, вели министерот за здравство.
Филипче ги осудува големи прослави и собири, оценувајќи дека со тоа се загрозува здравјето на граѓаните, но се загрозуваат и здравствените работници кои се преморени.
„Персоналот е преморен. Не можеме да издржиме без помош од граѓаните и почитување на мерките од нивна страна", порача Филипче, додавајќи дека во болниците се уште има доволно слободни места за прием на пациенти. Се уште нема одлука за јавно објавување на имињата на оние граѓани кои одбиваат да примат решение за изолација или даваат погрешни податоци. Од последните 400 испратени решенија по пошта, се вратиле 30, по што Филипче вели дека ќе се почека со одлуката.
Денеска, на предлог на Комисијата за заразни болести, владата ќе одлучува за ново попуштање на мерките кое ќе ги опфати казината, автомат-клубовите и апаратите во обложувалници, како и јавниот превоз во Тетово, а до крајот на неделава се очекува да се дозволи отворање и на теретани и фитнес-центри.
За укинување на мерката за државен карантин или самоизолација од 14 дена при влез во земјата, се уште нема одлука. На оваа тема ќе се разговара и утре, а Филипче смета дека е најдобро да се донесе одлука која ќе биде усогласена со сите земји од регионот.
Во изминатите 24 часа починале уште девет пациенти со што вкупниот број на жртви од коронавирусот од почетокот на епидемијата се искачи на 247 луѓе. Според Филипче, кај „огромен процент" од жртвите се работи за лица на постара возраст и со голем број претходни хронични здравствени состојби.
Како да не им дадете шанса на вирусите и бактериите во кујната?
Во време на пандемија на коронавирусот особено важна е хигиената, не само личната. Редовното и правилно миење раце е главната „заповед“ за личната хигиена но постојат и златни правила за хигиена во кујната.
Фотографија: Johanna Schmeller
Слушајте ја мајка ви!
Уште од мали научивме: рацете мора задолжително да се мијат пред јадење. Истото важи и за готвењето. Дури и повнимателно, затоа што кога готвиме, можеме да ја загадиме храната со бактерии, која потоа сите ќе ја јадат. Правилното миење на рацете трае најмалку 30 секунди. Насапунети треба да бидат ноктите како и наборите меѓу прстите.
Фотографија: picture alliance/dpa/C. Klose
Само еднаш не е доволно
Задолжително мијте ги рацете не само пред да започнете со готвењето, туку и во текот на целиот процес. Особено ако сте допреле сурово месо, риба, јајца или отпадоци. Бидејќи сите тие се носители на бактерии кои не треба да се шират на другите производи. Особено на суровата храна, како што се салатите или доматите.
Фотографија: dapd
Одделно месо, одделно зеленчук
За да се избегне контаминација меѓу различните производи, за животинските производи не треба да се користат исти алатки како за другите производи. Ова е особено важно за ножевите и за даските за сечење. Најдобро е да имате специјална даска и специјален нож само за сурово месо. Инаку, пред да ги користите за сечење на зеленчук, даската и ножот треба да се измијат со детергент и со топла вода.
Бактериите се минијатурни. Она што нам ни изгледа како гребаница е огромна шведска маса за салмонелата. Изгребаните кујнски даски многу тешко се мијат. Значи, ако даската е веќе премногу изгребана - подобро да купите нова.
За нас драскотина, за бактериите - вселена
Фотографија: picture-alliance/L. Halbauer
Менувајте ги почесто!
Кујнските крпи, сунѓери и четки се омилено засолниште за бактериитеи вирусите. Затоа, по секоја употреба, тие треба да се исплакнат со врела вода, а потоа да се исушат. Кујнски сунѓери и крпи не треба да се користат повеќе од неколку дена. Потоа треба да ги замените или да ги ставите во машината за перење на 70 степени.
За крпите истото важи како и за сунѓерите: по употребата тие треба да се исушат и да се заменат најмалку еднаш неделно. Со овие крпи, во никој случај не треба да сушите сурово месо или да ги бришете остатоците од протеини - за оваа намена користете хартиени крпи и потоа веднаш фрлете ги.
Фотографија: picture alliance/chromorange/B. Türk
Во ладно. И во кутии.
На температура под 7 Целзиусови степени, повеќето микроорганизми или не се репродуцираат или го прават тоа многу бавно. Затоа храната која брзо се расипува како месо, риба или јајца треба да се чуваат во најстудениот дел во фрижидерот - обично во кутиите на дното. Многу е важно редовно да се мие внатре фрижидерот, бидејќи во спротивно ќе се појават цели колонии бактерии.
Фотографија: Colourbox
Жешко!
Безбеден начин да се уништат вирусите и бактериите е високата температура. Затоа месото, рибата и јајцата секогаш треба да бидат добро термички обработени. Што значи дека внатрешноста на овие намирници треба да се загрева на најмалку 70 степени и најмалку 2 минути. Салатите, зеленчукот и овошјето кои се јадат свежи мораат да бидат добро измиени. И само тогаш можеме да посакаме: Добар апетит!
