Ракометарите на Металург успешно стартуваа во новата сезона во Лигата на шампионите, откако вчеравечер нагости кај Шамбери постигна победа од 33:30 (15:13). Во текот на целиот натпревар македонскиот шампион имаше контрола над резултатот и над играта и сосема заслужено ја запиша првата победа. Најубедливата предност Металург од шест голови ја имаше во 50. минута 31:25, која до крајот успеа да ја задржи.Најефикасни на натпреварот беа Наумче Мојсовски и Дејан Манасков со по 7 голови, додека Дарко Станиќ имаше 11 одбрани.

Следниот натпревар во Лигата на шампионите Металург ќе го одигра на 6 октомври во рамките од 2. коло, кога во Скопје ја пречекува екипата на Горење. На другите натпревари од Ц групата постигнати се следните резултати: Горење – Санкт Петерсбург 35:22 и Киелце – Силкеборг 35:26. Настапи и Кирил Лазаров, но неговата екипа Атлетико Мадрид во реприза на ланското финале загуби дома од европскиот првак Кил со 27:32. Лазаров постигна 7 голови.На другите натпревари од 1.коло беа постигнати следниве резултати:

А група: Флензбург – Монпеље 37:37, Чеховски Медведи – Партизан 38:31 и Адемар – Хамбург 26:28.

Б група: Савехоф – Констанца 35:31, Веспрем – Цеље 32:22 и Атлетико Мадрид – Кил 27:32.

Д група: Шафхаузен – Барселона 23:32, Загреб КО – ПИК Сегед 30:27 и Берлин – Динамо Минск 29:25.