Во Скопје претпладнево беше мирно, по вчерашното насилство во македонскиот парламент, во кое според МВР повредени биле повеќе од 100 лица.
Фотографија: (c) DW/Kostadin Delimitov
Реклама
Пред македонското Собрание во утринските и претпладневните часови беше мирно. Улицата пред Собранието, како што јави дописникот на ДВ, е блокирана за сообраќај, а во текот на утрото пред зградата на парламентот се распоредени дополнителни полициски единици и метални барикади. Пред зградата немало собрани граѓани, освен оние неколку шатори во кои ноќта ја минаа приврзеници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство . Симпатизерите на граѓанската иницијатива, која се противи на изборот за претседател на парламентот и на новата влада, шаторите ги поставија ноќеска и најавија дека ќе останат таму „колку што е потребно“, за да ја „одбранат Македонија“.
Фотографија: Reuters/O. Teofilovski
Министерството за внатрешни работи на Македонија извлече првичен биланс од насилство во Собранието, соопштувајќи декаа се повредени над 100 лица. Како што се наведува, во двете најголеми скопски болници ноќеска до 23.30 часот лекарска помош побарале 70 граѓани, 22 полицики служебеници и тројца пратеници. Дополнително во касарната „Ѓорче Петров“ лекарска помош им била укажана на уште 7 лица.
Телевизиските камери во Собранието снимија сцени на насилство досега невидени во историјата на парламентарната демократија на Македонија. Разгневените насилници меѓу демонстрантите од движењето „За заедничка Македонија“ нападнаа и повредија повеќе народни избраници и новинари, некои од нив и потешко.
Мачна вечер на насилство во Скопје
01:45
This browser does not support the video element.
Во немирите кои избувнаа кога во македонскиот парламент влегоа симпатизерите на „За заедничка Македонија, повредени беа лидерот на СДСМ и кандидатот на парламентарното мнозинство за премиер Зоран Заев, повеќе функционери од партијата, меѓу кои и заменичката претседател Радмила Шеќеринска, Хари Локвенец, Дамјан Манчевски како и лидерот на Алијанса за Албанците Зијадин Села, кој е префрлен во приватна клиника.
Безредијата започнаа околу 19 часот, откако парламентарното мнизинство, кое го сочинуваат СДСМ и албанските партии ДУИ, Беса и Алијанса за Албанците, го избраа Талат Џафери за претседател на Собранието, со противење на пратениците од ВМРО-ДПМНЕ.
Сведоштва за „крвавиот четврток“ во македонскиот парламент
Невидени хаотични слики: Откако мнозинството пратеници го избра пратеникот на ДУИ Талат Џафери за претседател на Собранието, на противење на пратениците од ВМРО ДПМНЕ, во законодавниот дом упадна толпа насилни луѓе.
Фотографија: Reuters/O. Teofilovski
Навала пред вратите на Парламентот
По изборот на Талат Џафери за нов претседател на Парламентот, од иницијативата „За заедничка Македонија“ ги повикаа граѓаните да излезат уште помасовно на протест, со цел да ја спасат државата од, како што истакнаа, влегување во сценарио од кое нема враќање назад. Толпата почна да притиска кон вратите на Собранието за да влезе во него.
Фотографија: Reuters/O. Teofilovski
Слабо присуство на полицијата
Неколку големи групи граѓани влегоа во парламентарната зграда, во пленарната сала, во фоајето и во други простории на парламентот, откако полицијата не го спречи првиот бран од граѓани кои протестираа против изборот на нов претседател на Собранието.
Фотографија: Reuters/O. Teofilovski
Незапирливо „заземање“ на Парламентот
Меѓу оние кои упаднаа имаше и маскирани лица со качулки, кои фрлаа столици во собраниските простории и медиумска опрема.
Фотографија: Reuters/O. Teofilovski
„За заедничка Македонија“ во Собранието
Во закондавниот дом завладеа хаос. Тука беа организаторите на иницијативата „За заедничка Македонија“, тука беа и министри и пратеници на ВМРО-ДПМНЕ.
Фотографија: picture-alliance/dpa/B. Grdanoski
Знамиња и песни
Дел демонстранти ја „зазедоа“ и Пленарната собраниска сала, каде што пееја песни и вееја знамиња.
Фотографија: picture-alliance/abaca/B. Ademi
Напади врз пратениците на СДСМ
Демонстранти навлегоа и во прес-центарот, каде што беа пратениците на СДСМ и ДУИ и почнаа да ги тепаат со столови и со сè што ќе им дојде до рака. Крвнички напаѓани беа Зоран Заев, Дамјан Манчевски, Максим Димитриевски, Радмила Шеќеринска, Хари Локвенец, Зијадин Села. Полиција немаше.
Фотографија: picture-alliance/abaca/N. Batev
Полицијата се „разбуди“
По повеќе од еден час по почетокот на инцидентите, полицајци влегоа во Собранието и се обидоа да ги извлечат пратениците од прес-центарот, но беа избркани од толпата што ги држеше како заложници. Толпата се забарикадира во прес-центарот.
Фотографија: Reuters/O. Teofilovski
Евакуација на повредените пратеници
Некаде пред 22 часот дојдоа и специјалци, па почнаа да се обидуваат да ги вадат повредените од забарикадираниот прес-центар.
Фотографија: Reuters/O. Teofilovski
Извлечени пратениците
Кратко пред полноќ пратениците од парламентарното мнозинство беа извлечени од Собранието, а пред него и понатаму останаа насобраните демонстранти.
Вкупно стотина лица се повредени, од кои четворица се пратеници. Целото Собрание е демолирано, тврдат новинари, од кои дел исто така беа напаѓани.
Фотографија: Reuters/O. Teofilovski
Шатори пред Собранието
Припадници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство, поставија шатори пред Собранието и најавија дека ќе останат таму „колку што е потребно“, за да ја „одбранат Македонија“.
