Пристигнувањето на специјален воз со посетител од висок ранг од Северна Кореја предизвика шпекулации во Пекинг дека властодржецот Ким Јонг Ун дошол во изненадувачка посета на Кина. Агенцијата Блумберг, укажувајќи дека за посетата знаеле три лица, јави дека мистериозниот висок гостин е навистина севернокорејскиот властодржец. На тоа укажуваат и фотографиите за зголемени мерки за безбедност и почесна гарда на железничката станица во Дандонг.

Ова би било првпат Ким Јонг Ун да ја напушта својата земја откако стапи на власт во 2011 година. Слични тајни посети со воз на Кина во 2010 и 2011 година оствари и неговиот татко Ким Јонг Ил. Потврда за тие посети стигнуваше дури откако Ким Јонг Ил се враќаше во својата земја. Јапонските медиуми вчера известија за простигнување на зелен вонреден воз, кој е сличен на оној кој своевремено го користеше и Ким Јонг Ил. Возот ја минал границата во неделата. Се вели дека посетата има за цел подобрување на односите на двете земји. Официјално нема потврда дека посетителот на Пекинг е Ким Јонг Ун. Портпаролката на кинеското Министерство за надворешни работи Хуа Чуинјинг изјави дека таа нема информации за такво нешто.

Посета на Кина би била дипломатски врв во напорите за смирување на судирот околу севернокорејската атомска програма. Со своето изненадувачко приближување кон Јужна Кореја од почетокот на годината севернокорејскиот властодржец веројатно почна да чекори во насока на можен самит со јужнокорејскиот претседател Мун Џае Ин во април и мај, како и средба со американскиот претседател Доналд Трамп. За четврток се планирани разговори со Јужна Кореја за подготовка на средбите.

Повеќе:

- Корејски конфликт: Разговори наместо ракети

- Приближување меѓу Северна и Јужна Кореја

Досега, во ваквите дипломатски напори Кина како голем сосед на Северна Кореја стоеше малку настрана. Двете земји негуваат традиционално пријателски односи, но поради севернокорејскиот развој на атомско оружје и ракети со долг дострел тој однос е многу тензичен. Пекинг засилено ги спроведува санкциите против Северна Кореја донесени од страна на Советот за безбедност на ОН, што кај сиромашниот и изолиран сосед предизвикува криза во снабдувањето.