Неколку илјади, претежно млади луѓе вечерва маршираа низ улиците на Скопје извикувајќи „Сакаме воздух“ и „Нема воздух, нема мир“. Демонстрантите побараа од владата и надлежното министерство да преземат итни мерки за намалување на загадувањето. Од невладините организации кои го организираа протестот порачаа дека владата има рок до 31 декември да ги исполни барањата кои и беа претставени на почетокот на месецов.

Активистите велат дека владата само формално ги прифаќа нивните барања, но не прави ништо конкретно за нивна реализација.
Протестот започна пред министерството за животна средина, а маршот финишираше пред владината зграда каде на демонстрантите им се обратија и неколкумина еколошки активисти. 

Голем дел од младите на протестот дојдоа со маски за дишење а на транспарентите доминираа критични пораки кон надлежните: „Ќе поцркаме“; „Не се дише“; „Доцнев на прв час, се изгубив во смогот“; гласеа дел од нив. Впечаток е дека меѓу демонстрантите најбројни беа средношколците.
Со исклучок на мала група млади кои се обидоа на протестот да му дадат политичка нотка скандирајќи „Никогаш северна, само Македонија“, останатите беа фокусирани на проблемот со загадувањето.

Политичките препукувања сепак не изостанаа, но беа фокусирани на социјалните мрежи и во редовните преписки меѓу партиите од власта и опозицијата.

Уште претпладнето, откако средношколците од „Никола Карев“ одлучија да ја бојкотираат наставата, се разгоре дебата околу потегот на директорката на училиштето која се обиде да им забрани на учениците да протестираат. Таа беше експресно сменета од функцијата од градоначалникот на Скопје Петре Шилегов.

Заменик-министерот за животна средина Јани Макрадули вечерва на „Телма“ изјави дека во изминативе два месеца загадувањето на воздухот во Скопје било најмало во последните десет години.

Од опозициската ВМРО-ДПМНЕ говорат за „енормно загадување на воздухот“ и најавуваат дека ќе поднесат информација на таа тема до Собранието.