Пред да стигнат гостите, Холгер Холман го свиткува светлосиниот турбан околу својата глава. Германецот од Бремен преку десет години живее во Велика Британија, во едно мало место западно од индустриската метропола Бирмингем. Тој конвертирал во индиската Сик-религија и оттогаш неговиот изглед е сличен на многумина Британци со потекло од британско-индиското колонијално кралство. Но, од референдумот за Брегзит, тој веќе не го посетува храмот на Сиките.

Меѓу Британците кои гласаа за излез од ЕУ спаѓаат и многумина од индиски доселенички семејства. Како доселеник од Европа, Халман денес се чувствува исклучен. Тој се ангажира во граѓанската иницијатива „Три милиони“ („the3million"),  мрежа на ЕУ-граѓани чија цел е одбрана на нивните права во Велика Британија по Брегзит. Многумина од нив велат дека се изложени на мобинг, на улица, во супермаркет, во прилики кога не зборуваат на англиски јазик. „Ми стана јасно дека немаме лоби дури ни во опозициската Лабуристичка партија“, вели Халман.

Повеќегодишна интеграција

По референдумот за Брегзит, станал свесен дека веќе не е дел од британското општество: „И тоа без оглед што сите овие години се интегрирав“. Тој во Велика Британија се доселил со својот поранешен партнер, на понуда на Британците, на кои им биле потребни стручњаци од ЕУ, на пример социјални работници како екс-партнерот на Халман.

Со оглед на тоа што Халман имал статус на самостоен претприемач од областа на медиумскиот дизајн, преселбата била целосно непроблематична, можел да работи насекаде: комјутер, приклучок за интернет и британскиот даночен систем му го направиле доселувањето едноставно. Ова не е нималку необична професионална биографија во ЕУ, во која постои слобода на движење и работа, право кое на ЕУ-граѓаните им овозможува своето живеалиште и работното место да го преместуваат во било која земја- членка. Меѓутоа, по референдумот за Брегизт, со леснотијата во овој поглед во Велика Британија е крај.

Страв од протерување по Брегзит

Две пријателки доаѓаат нагости: Даниела Штород е дете од гермаснко-британски брак и самата е мажена за Британец. Но, во меѓувреме таа порадо би живеела во Германија. Касиа Талбот пак по потекло е од Полска, каде го запознала својот британски сопруг, со кого е во брак од 2003. година. Халман послужува чај и кафе, и француски колачи.

Халман ја запознал Полјачката Талбот неодамна, откако дознал за нејзината потресна приказна: повеќе од една година мајката на две деца, родени во Велика Британија, била на работ на нервен слом, не можејќи да ја издржи неизвесноста и да се помири со свое евентуално протерување од земјата по Брегзит. Од таа причина побарала британско државјанство. „Беше вистински кошмар“, вели Талбот, зашто морала со куп документи да докажува каде и како живееле: лекарски извештаи, банкарски потврди, сметки. 

Повеќе на темата: 

Може ли Брегзит сепак да биде откажан?

Брегзит: Велика Британија сака да ја надитри ЕУ

Што значи „тврд“ Брегзит?

На Халман му е познато за што зборува Талбот. Зад него е неговата сопствена страдалничка приказна: по раскинувањето со неговиот германски партнер, тој влегол во нова врска и стапил во брак со индиски државјанин, за кого била потребна дозвола за престој, релативно непроблематична постапка во Германија и Франција.

Но, не и во Велика Британија по одлуката за Брегзит. Одеднаш британските власти побарале и од германскиот ЕУ-граѓанин Холман потврди и докази кога и каде живеел и престојувал. По заобиколни патишта тој дознал дека британските власти добиле инструкции од високи политички позиции од Лондон, да одбијат колку што е можно повеќе барања за дозволи за престој. „Од еден момент во друг човек е конфронтиран со прашањето: припаѓам ли јас всушност овде? Ме сакаат ли луѓето овде воопшто?“

Мобинг со државен амин

Движењето „3 милиони“ во меѓувреме собира докази за тоа дека владата на премиерката Тереза Меј ги охрабрува британските служби во вршењето мобинг врз ЕУ-граѓаните. На непријатески прием и одбивност во секојдневниот живот, како што тврдат самите, се изложени првенствено ЕУ-граѓаните од централно и источноевропските земји како Полска и Литванија, кои треба наместо на нивниот мајчин јазик да зборуваат на англиски. Во грофовијата Норфолк една граѓанска иницијатива кратко пред Божик растураше флаери со наслов: „Дали размислувате за доброволно враќање дома?“ Притоа, службата за социјални работи на грофовијата нуди помош на сите кои ќе решат да се преселат повторно на континентот. Флаерот е напишан на англиски, полски и ронмански јазик. „Во тек е проверка дали е ова воопшто законски легално“, вели портпаролката на „3 милиони“, Мајке Бон. 

Во регионот Норфолк се наоѓа изборната единица Греит Јармут на партискиот пријател на Тереза Меј, Брендон Луис. Во ова место на англискиот северен брег преку 70 проценти од граѓаните гласале за Брегзит. Пред реконструкцијата на владата на Меј, кратко пред новата година, Луис беше државен секретар за доселенички прашања, а на почетокот на јануари стана партиски лидер на британските конзервативци.

Холгер Халман порано бил ангажиран во граѓанска иницијатива во Бирмингем, која обединувала христијани, муслимани и Сики, како него. „Претежен дел од заедниците во Велика Британија живеат раздвоени едни од други“, вели тој. Сега тој е активен во нова граѓанска организација: „ЕУ-граѓаните изложени на мобинг“. Но, на Халман веќе му е доста. Неговиот индиски партнер однеодамна работи за фирма во сопственост на една голема француска банка и двајцата планираат преселба - во Париз.