Доаѓаат со автомобили, велосипеди или пеш, а носат свирчиња, барабани, банери - десетици илјади Полјаци пет дена по ред протестираат против заострувањето на законот за абортус во земјата. „Доволно е“, „Сакаме да имаме избор“, „Пеколот на жените“, „Имате крв на рацете“ - стои на плакатите кои демионстрантите ги носат низ Варшава и други полски градови наспроти забраната за протести поради пандемијата на коронавирус.

Полска не се смирува по одлуката на Врховниот суд со која и прекини на бременост поради тешки аномалии на неродено дете ќе се сметаат за противзаконски. Во Варшава пред сѐ млади девојки вчера блокираа раскрсници и го парализираа сообраќајот. Блокади на улиците имаше и во Познањ, Вроцлав и Краков, каде разлутени граѓани извикуваа: „Ова е војна“.

Католичка Полска има еден од најрестриктивните закони за абортус во Европа. Сега прекин на бременост е можен само ако е непосредно загрозен животот на идната мајка, или ако таа останала бремена со силување или инцест.

Владеачката партија Право и правда (ПиС) со години се бори за заострување на законот за абортус. Досега во Полска годишно се вршеа помалку од 2000 абортуси, главно поради аномалии на фетусот. Организации на права на жените проценуваат дека секоја година се вршат околу 200.000 нелегални абортуси во Полска, или за таа цел се оди во странство.

Полскиот премиер Матеуш Моравјецки денеска повика на смиреност и побара ставање крај на протестите во земјата. „Акти на анасилство, варварство и вандализам“, како и „напади врз верски симболи и цркви“ не се прифатлви, изјави тој пред новинарите. Моравјецки додаде дека насилнички акции може да доведат до „ескалација“ и предупреди дека протестите може да го забрзаат ширењето на коронавирусот во земјата.