Москва остро реагира на протерувањето руски дипломат
БГ
26 март 2018
Македонија одлучи да им се приклучи на земјите-членки на ЕУ кои протераа руски дипломати во знак на солидарност со Велика Британија. Руската амбасада возврати со остра реакција и предупредување
Фотографија: DW/P. Stojanovsk
Реклама
Македонија и Русија влегоа во нов дипломатски клинч откако македонското МНР попладнево одлучи да протера еден руски дипломат од амбасадата во Скопје. Одлуката е израз на солидарност со Велија Британија заради случајот Скрипал, велат во Скопје.
Руската амбасада веднаш се огласи на Твитер оценувајќи ја ваквата одлука за “непријателска и неоправдана”.
„Исклучително непријателски, неоправдан чекор што нема преседан во руско-македонските односи. Одговорноста за последиците од овој потег во целост ќе ги сноси македонската страна“, се закани руската амбасада.
Од македонското МНР објаснуваат дека одлуката била донесена “во тесна консултација со нашите сојузници и партнери од ЕУ и НАТО”.
Повеќе земји на ЕУ деновиве се солидаризираа со Велика Британија протерувајќи руски дипломати. Москва досега одговараше со реципроцитет на овие мерки.
Британскиот амбасадор во Скопје Чарлс Гарет ја поздрави одлуката на македонските власти како “моќен израз на солидарност”.
Односите меѓу Скопје и Москва не се на високо ниво од доаѓањето на власт на премиерот Зоран Заев. Русија се противи на влезот на Македонија во НАТО, а шефот на дипломатијата Сергеј Лавров тоа го потенцираше во неколку наврати. Минатата недела такво предупредување беше испратено и од средбата на македонскиот амбасадор во Москва, Гоце Карајанов со рускиот заменик-министер за надворешни работи Александер Грушко. Русија е членка на Советот за безбедност на ОН и беше меѓу првите кои ја признаа независноста на државата под уставното име во август 1992 година.
Лица и настани: 25 години независност
На 8 септември 1991 година Македонија ја прогласи својата независност. Резултатите од референдумското изјаснување јасно и недвосмислено ја покажаа волјата на мнозинството граѓани да живеат во сопствена држава.
Фотографија: MIA
„Нека ни е честита слободна, суверена, самостојна Македонија!“
Со овие зборови тогашниот претседател Киро Глигоров им го честиташе референдумскиот резултат на граѓаните собрани на плоштадот во Скопје.
Фотографија: Dnevnik
Песна и оро
Независноста беше прославена со песни и ора на плоштадот. Остварен беше идеалот на генерации Македонци кои се бореа за независна држава.
Фотографија: Dnevnik
Киро Глигоров
Глигоров беше првиот претседател на независна и суверена Македонија. Ќе остане запаметен по успешните преговори за мирно напуштање на југословенската федерација и по мудрото раководење со државата во клучните, критични моменти на 1990-те години.
Фотографија: Dnevnik
Стојан Андов
Андов беше прв претседател на плуралистичкото Собрание. Во долгата политичка кариера учествуваше во носењето на речиси сите клучни одлуки за државата. „Независноста беше највисокиот дострел во нашата историја“, изјави Андов за ДВ лани, на 24 годишнина.
Фотографија: DW/P. Stojanovski
„Врсник“ со независноста
Во 2011 година, по повод годишнината од независноста, објавивме интервју со Христијан Проданов. Тој е роден пред полноќ ноќта на 8 септември 1991 година. „Мајка ми и ден денес кога на телевизија ја даваат прославата од независноста ќе ме викне и ќе ми рече во овие мигови ти се раѓаш“, ни рече тогаш Христијан.
Фотографија: DW
Конфликтот од 2001
Конфликтот во 2001 година меѓу македонските безбедносни сили и албанските бунтовници предводени од паравоената ОНА, се закануваше да ја разори кревката демократија. Конфликтот заврши со потпишување на Охридскиот рамковен договор кој во меѓувреме беше вметнат и во Уставот.
Фотографија: AP
Смртта на Борис Трајковски
На 26 февруари 2004 година авионот со кој претседателот Борис Трајковски патуваше од Скопје кон Мостар, БиХ се урна во близина на крајната дестинација. Смртта длабоко ја потресе Македонија. Покрај Трајковски, загинаа и уште осум патници- членови на неговиот кабинет, како и членови на екипажот.
Фотографија: picture-alliance/AP Photo
Никола Груевски
Груевски ги одбележа последните десет години во македонската политика. Тој е политичар со најдолг стаж на премиерската функција, но резултатите од неговото владеење се, најблаго речено, спорни. 25 години од независноста Македонија е сеуште меѓу најсиромашните земји во Европа, со висока стапка на невработеност и уште подалеку од евро-атлантските интеграции.
Фотографија: Getty Images/AFP/R. Atanasovski
Шарената револуција
Иницијална каписла за најдолготрајните и најмасовни граѓански протести во македонската историја беше амнестијата која претседателот Ѓорге Иванов им ја додели на осомничените политичари и нивни соработници. Шарената револуција, како што подоцна беше наречена, успеа да се избори за повлекување на амнестијата. Наредниот период ќе покаже дали и останатите нејзини барања ќе бидат остварени.
