Заменикот претседател на шкотската полиција Стив Џонсон изјави дека според досегашните информации во нападот се повредени шест лица. Меѓу повредените е и еден полицаец, кој е пренесен во болница. Неговата состојба е „критична, но стабилна“, наведе Џонсон.

Полицијата на Твитер предупреди од „инцидент“. Во центарот на Глазгов е блокирана една улица. За населението, како што се вели, нема опасност.

Во меѓувреме, британските медиуми јавуваат за повеќемина загинати. Три лица, кои биле избодени на скалите на еден хотел, веројатно не го преживеаја нападот, јави Би-Би-Си. Жена сведок за Скај Њус изјави дека видела како спасувачите им пружаат помош на луѓе облеани во крв.

Нападот се случил во близина на железничката станица Глазгов Квин Стрит, помалата од двете главни железнички станици во градот.

Британскиот премиер Борис Џонсон на Твитер напиша дека е „длабоко погоден“ и дека со мислите е кај „сите жртви и нивните семејства“.

Пред само неколку дена човек со нож нападна посетители на еден парк во британскиот град Ридинг. Притоа беа убиени три лица, а повредени беа повеќемина. Медиумите цитираат роднини и поранешни соседи на осомничениот напаѓач кои зборуваат за психичко заболување на човекот. Полицијата и натаму води истрага за можен терористички напад.