Наследникот на Меркел си замина и од премиерската функција
25 октомври 2021![Düsseldorf | Laschet legt Amt als Ministerpräsident nieder](https://static.dw.com/image/59619081_800.webp)
Армин Лашет од денеска повеќе не е премиер на најголемата германска покраина Северна Рајна Вестфалија. 60-годишниот Лашет најави пред сојузните избори во септември дека ќе се повлече од покраинската функција, дури и доколку не стане нов германски канцелар. На утрешната прва седница на Бундестагот, Лашет ќе ја преземе својата пратеничка позиција.
Се очекува в среда, актуелниот министер за транспорт на Северна Рајна Вестфалија Хендрик Вуст да биде избран за нов премиер на специјална седница на покраинскиот парламент.
На парламентарните избори, конзервативците под раководство на Лашет го остварија најлошиот резултат во историјата. Победници беа социјалдемократите чиј кандидат за канцелар Олаф Шолц сега ги води преговорите за формирање нова влада заедно со Либералите и Зелените, по 16 годишното владеење на ЦДУ на Ангела Меркел. Притисокот врз Лашет е голем и во матичната партија да се повлече од функцијата.