Социјалните медиуми против терористичката пропаганда
НД/ дв
6 декември 2016
Четири интернет компании формираат заедничка иницијатива за идентификување на терористичката пропаганда. Официјални лица од германската влада тврдат дека социјалните медиуми „бавно“ ги отстрануваат спорните содржини.
Фотографија: picture-alliance/dpa/O. Berg
Реклама
Соочени со сѐ поголемо регрутирање на екстремисти и ширење на терористичка пропаганда преку социјалните медиуми, Фејсбук, Јутјуб, Микрософт и Твитер денеска најавија обновен напор за намалување на дистрибуцијата на содржини кои се користат за пропагирање на екстремизам.
Во соопштение за јавноста компаниите изјавија дека ќе креираат заедничка база на податоци во која ќе се регистрираат дигитални „отпечатоци“ од содржини кои се со терористичка природа.
„Се надеваме дека оваа соработка ќе води кон поголема ефикасност додека продолжуваме да ги спроведуваме нашите политики кои имаат за цел да ги ограничат терористичките содржини во онлајн просторот", беше наведено во соопштението за јавноста на компаниите.
Портпаролот на Фејсбук, Сели Алдос изјави дека новата програма ќе започне со работа на почетокот на 2017 година и дека нејзината цел е да се бори со „најочигледниот" вид на содржина која се користи од различни групи чија цел е поттикнување на тероризмот.
„Се бориме против очигледно најсериозната содржина која се споделува онлајн – тоа се видеата за регрутација и видеата кои покажуваат обезглавување, кои во најголема мера се против нашата политика за споделување содржини“, изјави таа.
„Многу бавно“
Заедничката програмата на четирите компании се воведува во време на зголемен притисок од западните држави за отстранување на екстремистичките содржини од социјалните медиуми.
Германскиот министер за правда Хајко Мас во октомври им се закани на операторите на социјални медиуми со правни реперкусии доколку не успеат да ги отстранат случаите на говор на омраза, велејќи дека дотогашното отстранување било „многу бавно“.
Сепак, количеството на содржини кои циркулираат онлајн, заедно со загриженоста од можното ограничување на слободата на говор, е предизвик за способноста на компаниите за брзо и ефикасно отстранување на таквите содржини.
„Од средината на 2015 година суспендиравме повеќе од 360.000 кориснички сметки за прекршување на политиката на Твитер за насилни закани и промоција на тероризам“, изјави Шинед Мексвини, заменик претседател за јавна политика во Твитер.
„Голем дел од овие сметки беа отстранети преку технички средства, вклучувајќи ги нашите алатки за отстранување на спам содржини“, додаде Мексвини.
Четирите компании изјавија дека во иднина планираат да вклучат и други субјекти во заедничката борба против екстремистичките содржини.
Што всушност претставува „Исламска држава“?
„Исламска држава“, покрај разорувањата во Ирак и Сирија, во вестите често се наоѓа и поради нејзината бруталност. Што е ИД и колку е моќна? Во продолжение ви претставуваме одговори на најчесто поставуваните прашања.
Што е „Исламска држава“?
Се смета дека „Исламска држава“ е фракција од терористичката организација Ал Каеда, т.е. сунитска милитантна група, за која се верува дека е формирана како одговор на недовербата и фрустрациите од неуспешното владеење на владите во Сирија и Ирак. На нивното знаме пишува „Мухамед е пророкот на Бог“ и „Нема друг бог освен Алах“ - фрази со кои се согласуваат сите муслимани, не само „ИД“.
Фотографија: AP
Каде е активна „Исламска држава“
Целта на „Исламска држава“ е формирање на „калифат“ - држава каде се почитуваат традиционалните вредности на исламот и шеријатското право. Поради нестабилноста на регионите во Сирија и Ирак, „Исламска држава“ успеа да освои и да стави под своја контрола тероитории во двете држави.
Што ја прави „Исламска држава“ различна?
Клучна разлика е бруталноста на „Исламска држава“ со која се влева страв кај противниците и цивилите - преку егзекуцијата со обезглавување и бруталното насилство. Лидерите на „ИД“ велат дека владеат со регионите кои ги освојуваат. Експертот за Средниот Исток, Шади Хамид за ПБС изјави: „Тие нудат социјални услуги. Управуваат со локалната власт. Обезбедуваат минимално ниво на право и поредок“.
Фотографија: gebphotography - Fotolia.com
„ИД“ во однос на останатите терористички организации?
„ИД“ е активна во Сирија и Ирак, но нигериската терористичка организација Боко Харам неодамна ја изрази својата поддршка. Тоа е како натпревар во суровост: додека Боко Харам е одговорна за 13.000 смртни случаи, „ИД“ е одговорна за најмалку 24.000 повредени или убиени. Ал Каеда се дистанцираше од „ИД“, а една од нејзините фракции наречена Нусра Фронт се бори против „ИД“.
Фотографија: Getty Images/A. Katib
Кои се следбениците на „Исламска држава“?
Нешто по кое се разликува „ИД“ се нејзините следбеници. Повеќе од 20.000 странски борци се придружија на групата, од кои повеќе од 4.000 доаѓаат од западна Европа и северна Америка. На сликата се прикажани државите од каде што потекнувааат најголемиот дел на борците. Најголем број борци - споредено со вкупниот број на жители на земјите, доаѓаат од мали земји како Шведска и Белгија.
Што преземаат западните влади против „Исламска држава“?
Од август 2014 година, коалиција предводена од САД спроведува воздушни напади против цели на „ИД“ во Сирија (1.422 напади) и Ирак (2.242 напади). Некои влади исто така беа активни во рамките на нивните држави: Германија ќе процесуира најмалку 30 осомничени милитанти кои се вратиле од Сирија, додека Саудиска Арабија уапси 93 осомничени милитанти во април 2015 година.
