111109 El-Sherbini Urteil Reax
12 ноември 2009![](https://static.dw.com/image/4839069_800.webp)
Судот во Дрезден го осуди Алекс В. на казна доживотен затвор и ја призна и посебната тежина на вината, со што осудениот не може да смета на пуштање на слобода по 15 години. Тој ќе мора значително подолго да остане в затвор.
На пресудата чекаа повеќе од стотина муслимани од Германија, собрани пред покраинскиот суд во Дрезден. По објавувањето дел од нив изјавија:
„Да добиеше помалку, немаше да го прифатам тоа, бидејќи тој изврши две убиства. Жената беше и бремена.“
„Да, тоа е исправна пресуда, сосема исправна. Мое мислење е дека тоа го заслужува, бидејќи свесно го изврши делото. Го испитувале психолози, тој го стори тоа од омраза и гнев кон муслиманите.“
„Сметам дека е праведно за тоа што го стори. И така и треба да биде, оние кои вршат такви неправедни дела, треба да бидат казнети за нив. Тоа беше навистина страшно - страшно и за муслиманите.“
Смислен злостор
Бранителот на Алекс В. се обидуваше да докаже дека станува збор за убиство од небрежност, со што Алекс В. би требало да остане пократко време в затвор. Таквата аргументација предизвика отпор кај Наџиб Нагуб, претседателот на Арапската комисија за човекови права во Германија: „Тоа за мене не беше разбирливо. Сметам дека е страшно ако убиство во судска сала се прикажува како убиство од небрежност. Човекот го внесол ножот во судската сала во својот ранец, што значи дека убиството било испланирано, како што впрочем тврдеше и јавниот обвинител.“
Апел до владата
Пресудата на покраинскиот суд во Дрезден е исправна, смета и претседателот на Турската заедница во Германија, Кенан Колат: „Пресудата е донесена, таква и очекувавме. Мислам дека и обвинетиот очекуваше доживотна казна затвор. Сметам дека е штета што немаше ниту еден претставник на сојузната влада, за да демонстрираме единство во борбата против исламофобијата. Очекувам владата сега да преземе мерки против секакви тенденции на непријателство кон муслиманите“, порача претседателот на Турската заедница во Германија, Кенан Колат.
Автор: Карстен Волф / Горан Чутаноски
Редактор: Елизабета Милошевска Фиданоска