Германскиот министер за одбрана Томас де Мезие нагласи дека Берлин се одлучил на тој чекор за да ги растовари останатите партнери од НАТО, кои се ангажирани во мисијата во Либија. Одлуката на владиниот кабинет е „политички сигнал за нашата солидарност“, рече Мезие, нагласувајќи дека на Германија не и` се потребни лекции од никого, кога е солидарноста во прашање.

Новиот мандат, исто како и актуелниот ангажман на трупите ИСАФ, е временски ограничен и треба да заврши во јануари 2012 година. Се задржува и максималниот број германски војници во рамки на мисијата ИСАФ, имено вкупно 5.350. За мисијата АВАКС ќе се посегне по таканречените флексибилни резервисти, кои стојат на располагање за трупите на ИСАФ. За одлуката на владата треба да се изјасни и германскиот Бундестаг, кој уште денеска ќе расправа по тоа прашање. Гласањето се очекува во петок.

Германија се повлекува од мисијата во Средоземно Море

И германскиот министер за надворешни работи, Гидо Вестервеле, исто така нагласи дека испраќањето на дополнителни триста пилоти во Авганистан ќе биде големо олеснување на товарот за земјите, кои ја спроведуваат резолуцијата на ОН за забрана на летови над Либија.

При гласањето во Советот за безбедност, Германија беше воздржана, а јасно стави до знаење и дека нема да испрати војници на Бундесверот во акцијата во Либија. По вчерашната одлука на Советот на Алијансата нејзини единици да се вклучат во надгледувањето на ембаргото за извоз на оружје во Либија по морски пат, Берлин одлучи да ги повлече сите свои единици од операциите на НАТО во Средоземното Море. Две фрегати и други два борбени брода, со вкупно 550 морнари, повторно се наоѓаат под национална команда.

Автор: ТТ/ГЧ/дпа/афп

Редактор: Елизабета Милошевска Фиданоска