Посмртните останки на жртвите од автобуската несреќа во Бугарија на аеродромот во Скопје пристигнаа со два бугарски транспортни авиона. Тие беа преземени со највисоки државни почести. На аеродромот последна почит на загинатите со положување венци им оддаде државниот врв, а на испраќањето присуствуваа и роднини на загинатите, министри, пратеници, претставници на верските заедници, како и странски делегации.

Според протоколот, телата за загинатите со 45 погребални возила ќе бидат пренесени кај семејствата, а потоа погребани. 

По вчера најавениот план за пречек и испраќање на посмртните останки на загинатите, вечерта беше направена измена: нема да има колона по булеварот „Гоце Делчев“, како што претходно беше најавено од МНР.

„Посмртните останки на загинатите граѓани во автобуската несреќа во Бугарија после нивниот транспорт на аеродромот во Скопје, веднаш ќе бидат упатени кон нивните домови и вечни почивалишта. Оваа измена доаѓа согласно барањата на дел од семејствата на загинатите, а со цел телата да бидат предадени пред петочната молитва. За граѓаните кои сакаат да оддадат почит, сѐ уште останува можноста тоа да го сторат на плоштадот Скендербег во периодот од 10 до 13 часот“, соопшти МНР.

Повеќе:

Последното патување

Сѐ за трагедијата со македонскиот автобус во Бугарија

На плоштадот Скендербег во Скопје се поставени венци пред кои граѓаните може да им оддадат почит на загинатите во несреќата која се случи на 23 ноември, на автопатот „Струма“, во близина градот Перник во Бугарија. Во несреќата на автобусот на „Беса транс“ загинаа 45 лица, а седуммина беа повредени.