Српскиот претседател Томислав Николиќ за Радиотелевизија Србија (РТС) оцени дека поради инсистирање на Албанците за толкување на договорот Белград-Приштина на нивен начин, ќе се види дали Србија ќе ја загуби приликата за добивање датум за преговори со ЕУ. Според него, време е и луѓето кои ја водат ЕУ „да станат сериозни“ и да кажат отворено што сакаат, како и да престанат да се кријат зад своите чиновници.

Српскиот премиер Ивица Дачиќ претходно изрази уверување дека планот за имплементација на договорот за нормализација на односите на Белград и Приштина ќе биде завршен за седум до десет дена. Според Дачиќ, во втората половина на мај би требало да продолжи дијалогот со Приштина на највисоко ниво, а претстојат разговори за имотот, враќање на раселените, заштита на црквите и културните добра, како и за прашањата на амнестија, енергетика и телекомуникации.

Шефот на работната група на Приштина на разговорите за примена на договорот во Брисел изјави дека вчера и завчера (07/08.05) во Брисел не дошло до договор затоа што српската страна излегла со нови барања за кои не може да се расправа.