Новата балканска бегалска рута ја исплаши Австрија
30 мај 2018
Се раѓа нова балканска рута, предупредува австрискиот канцелар Себастијан Курц и најавува затворање на границите на неговата земја доколку бројот на бегалци продолжи да расте.
Фотографија: Klix.ba
Реклама
Додека вниманието на европските земји е насочено кон Средоземното Море и бегалците кои доаѓаат од Африка, речиси незабележано минува новиот тренд на транзитирање на мигранти од Турција, преку земјите од Југоисточна Европа до централна и западна Европа.
Весникот „Цајт“ денеска пишува дека само во Босна и Херцеговина во моментов престојуваат 4.300 бегалци и мигранти, пет пати повеќе од целата мината година. Германското министерство за внатрешни работи ја нарекува БиХ „жешка точка во илегалната миграција“.
„Во Европа се мислеше дека балканската рута е затворена. Тоа е очигледно погрешно. Од германското министерство за внатрешни работи информираат дека нивните колеги во БиХ дневно регистрираат меѓу 100 и 150 мигранти кои незаконски влегуваат во земјата. Бројката е зголемена за 12 пати во однос на 2017 година. Една четвртина од бегалците и мигрантите се Сиријци, а по нив следуваат Пакистанци, Авганистанци, Ирачани и Либијци. И Црна Гора и Албанија пријавуваат двојно зголемување на бројот на бегалци на нивна територија“.
„(...) Три бегалски рути во моментов водат до границата на ЕУ. Првата води од Србија, каде голем број бегалци се заглавени уште од 2015 година. Втората и третата рута доаѓаат од Турција. И тоа, и покрај тврдењата дека по Договорот со ЕУ оттаму не доаѓаат речиси воопшто бегалци. И тоа е заблуда“, пишува „Цајт“.
Бегалски шатори во СараевоФотографија: DW/S. Huseinovic
Ваквиот развој на состојбата особено ја загрижи владата во Австрија. Канцеларот Себастијан Курц предупредува дека „се воспоставува нова балканска рута“. Швајцарскиот Ноје Цирхер Цајтунг истата ја нарекува „Албанска рута“, затоа што минува од Грција, преку Албанија, Црна Гора и Босна и Херцеговина се до Словенија. Весникот ја цитира и изјавата на австрискиот министер за внатрешни работи Херберт Кикл дека, доколку приливот на бегалци продолжи да расте, границата ќе биде херметички затворена.
„Во Австрија годинава, до крајот на март, според официјалните статистики, поднесени се 4.000 барања за азил. Тоа одговора на бројките кои беа вообичаени во времето пред бегалската криза. Во кризната 2015 година, азил во Австрија побараа 90.000 луѓе“.
Канцеларот Курц во понеделникот претстави и реформа на социјалната помош, која предвидува помали исплати за бегалците.
„За да избегнат месечно одбивање од 300 евра на максималната сума од 863 евра, бегалците мора да поднесат доказ за доволно познавање на германскиот јазик. Целта е борба против доселување во нашите социјални системи“, како што ја пренесува изјавата на Курц, весникот Зидојче цајтунг.
Луѓето на Балканската рута
Стотици илјади луѓе пред една година патуваа кон север преку Балканската рута. Подоцна бројот на бегалците значително се намали, но сѐ уште преку Балканот минуваат илјадници луѓе. Марија Илчева сретна дел од нив.
Фотографија: DW/M. Ilcheva
Родено во бегство
„Во Грција сме од пред шест месеци. Нашето бебе е родено во Турција“, раскажуваат Ахмад и Винус. Тие доаѓаат од село во близина на Латакиа. Во руските бомбашки напади загубиле сѐ.
Фотографија: DW/M. Ilcheva
Десет години бегалец
Абдуламир има 49 години. Последните 10 години овој Ирачанец живее во бегство. Во февруари 2016 дошол во Грција. „Непосредно пред грчкиот брег се појави брод на турската крајбрежна стража. Тој предизвика големи бранови. Смртно се преплашивме.“
Фотографија: DW/M. Ilcheva
Кон Германија, „како и останатите“
„Во Бугарија стигнав вчера - преку Турција. Одам за Германија, како и останатите“, вели со широка насмевка 18-годишниот Фарман од Пакистан. „Германија е многу убава. Таму сакам да работам како готвач. Можам многу добро да готвам.“
Фотографија: DW/M. Ilcheva
„Кон Германија - по секоја цена“
„Србите по трет пат ме вратија назад во Бугарија. Но, ќе се обидам повторно. Одам за Германија, по секоја цена“, вели 28-годишниот Пакистанец Васим (со бела маичка). „Многу други успеаја, ќе успеам и јас.“
Фотографија: DW/M. Ilcheva
Две семејства од Кина
Во бугарскиот бегалски камп Пастрогор доминираат млади луѓе од Авганистан и Пакистан. Таму живеат само две семејства. Тие се Монголци од Кина. И тие сакаат во Германија. Доаѓаат од Шилин Гол во автономната територија Внатрешна Монголија во НР Кина. „Постојано сме изложени на репресии поради тоа што сме Монголци.“
Фотографија: DW/M. Ilcheva
Во Германија за да биде таксист
Патот од Пакистан до Германија го чини 6 илјади американски долари. Али (лево) е две недели во бугарскиот камп Пастрогор. Сега чека повик од шверцерот. „Морам да заминам за Германија. Мора да ја поддржувам финансиски мојата фамилија во Пакистан. Можам да возам такси.“
Фотографија: DW/M. Ilcheva
Христијанин меѓу муслимани
„Јас сум христијанин и постојано сум навредуван од муслиманите во овој бегалски камп“, вели 22-годишниот анестезиолог од Иран. „Можам да си претставам да живеам во Бугарија. Само морам задолжително да се тргнам од луѓето со поинаква вера. Тие ми додеваат.“
Фотографија: DW/M. Ilcheva
„Вратете ме назад“
„Please, Mister, please, deport. Pakistan“, го моли овој човек (десно) раководителот на сместувалиштето за бегалци во Пастрогор. Неговото дете тешко се разболело и тој бара да го вратат кај него. „Патувањето за Европа беше грешка“, вели тој. Не е единствениот што мисли така. Назад сакаат и некои бегалци од Авганистан.
Фотографија: DW/M. Ilcheva
Тепан од полицајци
Хорам од Пакистан неколку дена е во бегалскиот камп во српскиот град Суботица. Тој веќе се обидел да ја мине границата со Унгарија. „Таму бев брутално истепан од унгарски полицајци. Зошто? Не разбирам.“
Фотографија: DW/M. Ilcheva
Посредно преку Италија
Омар Хидад е во бегство 11 месеци. 23-годишниот Пакистанец во меѓувреме е во Србија. Од Суботица сака да продолжи за Италија. „Таму добиваме азил многу бргу. Потоа ќе можеме да патуваме каде што сакаме“, се надева Хидад.
Фотографија: DW/M. Ilcheva
Надеж за враќање
„Две недели сум во Келебија и се надевам дека наскоро ќе смеам да поднесам барање за азил во Унгарија“, вели ова момче од Сирија на српско-унгарската граница. „Кога војната во Сирија ќе заврши, ќе се вратам назад. Сирија е моја татковина. Моето срце ѝ припаѓа нејзе.“
Фотографија: DW/M. Ilcheva
„Меркел нѐ покани“
„Што направи госпоѓа Меркел?“, прашува ова момче од Авганистан. Тој една недела е во транзитната зона на српско-унгарската граница. „Таа нѐ покани и сега? Сега ги затвори границите. Зошто?“
