Бројот на заболени од Ковид-19 во Северна Македонија достигна 31 лице. Пет нови заразени се евидентирани вечерва. Од нив четири се медицински лица од Дебар.
Фотографија: Regierung Nordmazedonien
Реклама
Четири медицински лица од Дебар и сопружник на претходно заболено лице од Скопје, се новите случаи на коронавирус во земјата. Двајцата доктори и двете медицински сестри од Дебар веројатно се заразиле од некој од пациентите кои ги лекувале. Министерот за здравство Венко Филипче најави дека од утре во болницата до Дебар ќе заминат и двајца доктори од Клиниката за пулмологија во Скопје.
Филипче уште еднаш порача дека мора да се води грижа за здравствените работници и оцени дека нивната работа е „непроценлива“.
Претходно денеска, Филипче предупреди дека бројот на заболени ќе расте и процени дека пикот на кризата ќе пристигне некаде за еден месец. Попладнето беа евидентирани уште три случаи, со што вкупниот број на заболени се искачи на 31 лице.
Вечерва на скопскиот аеродром се очекува да пристигне авион од Брисел за кој постојат информации дека превезува патници заболени од коронавирус. Филипче рече дека сомнителните патници ќе бидат веднаш однесени на тестирање на Инфективната клиника, додека сите останати ќе мора да останат на аеродромот во Скопје додека не бидат познати резултатите.
Попладнево беше соопштено дека околу 200 македонски државјани кои беа заглавени на унгарско-српската граница, а кои воглавно доаѓаат од земји со висок ризик како Италија и Австрија, веднаш по пристигнувањето во земјата ќе бидат префрлени во карантин во касарната во Криволак. Таму им се обезбедени услови, снабдување со храна, медицинска поддршка за проверка, прегледи, како и соодветно обезбедување, вели министерот.
Упатства: Како да се заштитите од коронавирус
Луѓето ширум светот ставаат заштитни маски за дишење за да спречат вирусна инфекција. Сепак, други мерки се поефикасни. Еве неколку совети засновани на упатствата на СЗО.
Фотографија: Getty Images/X. Chu
Подобро од ништо
Не е докажано дека маските за лице можат ефикасно да ве заштитат од вирусни инфекции. Овие маски веројатно се во можност да фатат некои микроби пред да стигнат до устата или носот. Но уште поважно е тоа дека тие ги спречуваат луѓето да ги допираат устата или носот (што повеќето луѓе го прават инстинктивно). Ако веќе сте болни, таквите маски може да спречат да не заразувате други.
Фотографија: Getty Images/Stringer
Дезинфицирајте ги рацете
Во својот список на препораки како да се заштитите од зарази, Светската здравствена организација не споменува маски за лице. На врвот е често миењето на рацете. СЗО препорачува дезинфекциско средство за рацете на база на алкохол, како на фотографијата, кои најчесто ги гледаме во болниците
Фотографија: picture-alliance/dpa/S. Pilick
И сапун и вода ќе завршат работа
Поедноставното секојдневно решение се водата и сапунот, ако ги имате при рака. Но, проверете дали темелно ги миете рацете...
Фотографија: picture alliance/dpa/C. Klose
Кашлање и кивање - но направете го тоа правилно!
Еве што препорачуваат лекарите: Кога кашлате и кивате, покријте ја устата и носот со вашиот подигнат лакот. Или користете книжни марамчиња - но потоа веднаш фрлете го марамчето и измијте ги рацете. А кошулата или џемперот? Не, нив не мора да ги фрлите. Но, перете ги често или однесете ги на хемиско чистење.
Фотографија: Fotolia/Brenda Carson
Стојте подалеку!
Друга препорака која можеби не функционира за сите: Избегнувајте близок контакт со секој кој има треска и кашлица! Ако треба да имате контакт со болни луѓе, погрижете се да преземете дополнителни заштитни мерки.
Фотографија: picture alliance/empics
Имате треска? Одете на лекар, а не на патување!
Ако имате треска, кашлица и отежнато дишење, побарајте лекарска помош навреме. Избегнувајте јавни места за да не ги инфицирате другите. И, исто така, објаснете му на вашиот лекар каде претходно сте патувале.
Фотографија: Reuters/P. Mikheyev
Избегнувајте контакт!
При посета на сточни и зелени пазари во области во кои во моментот има случаи на новиот коронавирус, избегнувајте директен незаштитен контакт со живи животни. Тоа исто така вклучува какви било површини кои се во контакт со животни.
Фотографија: DW
Добро термички обработено - не сурово!
Варете,печете и пржете го месото темелно. Потребно е да се избегне конзумирање на сурови, недоволно термички обработени производи од животинско потекло. Со суровото месо, млекото или животинските органи треба да се постапува внимателно за да се избегне инфицирање од термички необработена храна. Овие се добри практики за безбедност на храната и помагаат да се спречи ширењето на болести.
