Американскиот претседател имаше намера да го укине статусот на заштита за мигрантите кои како деца илегално дошле во САД. Судот во Сан Франциско ваквата одлука на Трамп ја прогласи за неважечка.
Фотографија: Getty Images/David McNew
Реклама
Американскиот сојузен судија Вилијам Алсап ја блокираше одлуката на претседателот Доналд Трамп за ставање крај на програмата за заштита на младите доселеници од протерување. Владата засега мора да го остави во сила т.н. ДАЦА-декрет (Deferred Action for Childhood Arrivals), побара судијата во својата одлука напишана на 49 страници.
Трамп во септември стави крај на програмата за заштита на млaдите мигранти. Програмата донесена во мандатот на Барак Обама им овозможува на околу 700.000 луѓе кои во САД дошле илегално на детска возраст да останат во земјата легално и да добијат можност за работа. Според Трамп, Конгресот требаше до 5 март 2018 година да најде законско решение за ваквите доселеници или во спротивно тие ќе го загубат својот статус. Против одлуката на Трамп, меѓу другите, жалба поднесе и сојузната држава Калифорнија. Ваквиот чекор на американскиот претседател остро го критикуваа и американските концерни. За овие доселеници, т.н. „сонувачи“, САД се често единствената земја која тие ја нарекуваат свој дом. Протерување за нив би значело почеток во за нив прилично нова земја.
Фотографија: picture-alliance/dpa/Zumapress
Декретот ДАЦА во моментов е тема и во Конгресот. Демократите и републиканците спорат околу иднината на политиката на доселување. Вчера врвни претставници на двете партии имаа средба со Трамп за да преговараат за можните мерки. Претседателот притоа повтори дека има намера планираната изградба на ѕид на границата со Мексико да ја комбинира со договор за младите мигранти.
Граница САД-Мексико: Бетон наместо челик
Ѕидот на границата со Мексико ќе се гради. Американскиот претседател Доналд Трамп потпиша соодветен декрет. На делови од границата веќе има ограда. Дали сега челикот ќе биде заменет со бетон?
Фотографија: Reuters/J. L. Gonzalez
Трамп има искуство со градење
„На нашата јужна граница ќе изградам голем ѕид. Никој не гради ѕидови подобро од мене и за тој ѕид ќе плати и Мексико.“ Тоа американскиот претседател Доналд Трамп го изјави во текот на кампањата. Досега тој градеше пред сѐ висококатници и хотели. Ѕидот на границата е на прво место на неговиот план од 10 точки во делот на политиката на доселување.
Фотографија: picture-alliance/AP Photo/C. Torres
Крај кој завршува „нигде-никаде“
Границата меѓу САД и Мексико е долга околу 3.200 километри. Од нив со жица се обезбедени околу 1.100 километри. Границата минува низ четири американски и шест мексикански сојузни држави, минува низ пустина и големи градови. Поради лошата пристапност, еден мал дел од границата во Њу Мексико е отворен. На други места пак патролираат службеници за заштити на границата.
Фотографија: Reuters/M. Blake
Несовладлив челичен џин
Бројот на илегални доселеници во САД се проценува на околу 350.000 годишно. Голем дел од нив доаѓаат од Мексико. Дел од доселениците од Мексико се толерираат. Од друга страна, мексиканските семејства не добиваат виза. Доселениците си посакуваат подобар живот, работа и повеќе пари за своите семејства.
Фотографија: picture-alliance/dpa/A. Zepeda
Само мал допир
Семејствата живеат разделени со ограда. Прегратка не е можна. Во најдобар случај низ челичните шипки може да се протне рака. Ако Доналд Трамп го оствари најавеното, тогаш наместо челик овде ќе има бетон. Тогаш и мал допир нема да биде можен.
Фотографија: picture-alliance/ZumaPress/J. West
Од изолација до предрасуди
„Кога Мексико праќа луѓе, тогаш не ги испраќа најдобрите“, рече Трамп во текот на кампањата. „Испраќа луѓе кои прават многу проблеми. Тие носат дрога, злосторства, силувачи. Некои, би рекол, се и добри луѓе.“ Трамп сака да ги протера илегалните доселеници, барем оние кои се со криминално досие. Сепак, и покрај заканите, многу Мексиканци не се откажуваат од своите планови за бегство во САД.
Фотографија: picture-alliance/AP Photo/G. Bull
Пустина, граница и назад
За некои Мексиканци сонот завршува на границата. Тие завршуваат в затвор. Други за илегално минување преку границата плаќаат со својот живот. Медиумите критикуваат дека безбедносните сили пукаат преку границата. Дури во 2015 година за тоа првпат е обвинет припадник на американската погранична служба.
Фотографија: Reuters/D.A. Garcia
Со сачмарка против непожелните гости
Џим Чилтон, американски фармер, во патрола низ својот имот. Неговата фарма на површина од 200.000 квадратни метри на југоистокот од Аризона граничи директно со Мексико. Помеѓу има само бодликава жица. Чилтон се смета себеси лично одговорен за безбедноста и одвреме-навреме посега по сачмарката.
Фотографија: Getty Images/AFP/F.J. Brown
Чуден крај
„Тортиља ѕид“ е потценувачкиот назив на 22,5 километри долгиот дел од границата меѓу Отеј Меса Бордер Кросинг во Сан Диего (Калифорнија) и Пацификот. Оградата завршува во водата. За да се побегне на другата страна е доволно само да се исплива околу оградата.
