Катастрофален земјотрес: Стотици загинати во Авганистан
СН/агенции
22 јуни 2022
Во земјотресот во пограничната област меѓу Авганистан и Пакистан се јавува дека загинале над 920 луѓе, а стотици се повредени. Распоредувањето на спасувачите во оддалечените планински региони се одвива тешко.
Разурната куќа во авганистанскиот регион Пактика по силниот земјотрес Фотографија: Bakhtar News Agency/dpa/picture alliance
Реклама
Според досегашните информации од локалните власти во погодените области во Авганистан, најмалку 920 луѓе загинале во силниот земјотрес почувствуван во авганистанско-пакистанскиот пограничен регион. Уште најмалку 600 лица се повредени во земјотресот во провинцијата Пактика, јави авганистанската државна новинска агенција Бахтар.
Земјотресот за кој најнапред беше јавено дека имал интензитет од 6,1 степени по Рихтеровата скала во средата во раните утрински часови ги погоди густо населените Авганистан и Пакистан.
Американскиот геолошки завод (УСГС) пак подоцна објави дека земјотресот имал интензитет од 5,9 степени. Според УСГС, епицентарот на земјотресот бил на околу 50 километри југозападно од градот Хост во близина на границата со Пакистан на длабочина од околу десет километри.
Спасувачите од Црвената полумесечнина се упатуваат во погодените региони во АвганистанФотографија: Bakhtar News Agency/dpa/picture alliance
„За жал, минатата ноќ дојде до силен земјотрес во четри области во провинцијата Пактика, во кој настрадаа и се повредени стотици наши сограѓани и уништени се десетици куќи“, напиша на Твитер Милал Карими, портпарол на владата.
Тој ги повика сите итни служби веднаш да испратат екипи на терен за да се спречи натамошна катастрофа.
Поголемиот број смртни случаи се забележани во покраината Пактика, рече Мохамад Насим Хакани, челник на талибанската влада за управување со катастрофи.
Починати има и во источните покраини Нангархара и Кос, додаде тој.
Земјотресот се почувствувал во распон од околу 500 километри во Пакистан, Авганистан и во Индија, соопшти Европскиот медитерански сеизмолошки центар.
Земјотреси кои го потресоа светот
Од големите земјотреси во Антиохија во 342 и 526 година, до денес, историјата памети огромни потреси кои неретко биле проследени и со гигантски цунами бранови во некои делови од светот.
Фотографија: picture-alliance/D. Nucci/NurPhoto
Централна Италија во рушевини
Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.
Фотографија: picture-alliance/dpa/M. Gambarini
Лабрадорот Лео
Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.
Фотографија: picture alliance/AP Images/L'Osservatore Romano
Танзанија
Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.
Фотографија: Imago/Xinhua
Вежби за децата во Јапонија
Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.
Фотографија: picture-alliance/dpa/M. Taga
Потрага по најблиските (Беичуан, Кина)
Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.
Фотографија: Getty Images/China Photos
Катастрофата во Хаити
На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.
Фотографија: picture alliance/dpa
Земјотресот во Суматра
На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.
Фотографија: Getty Images/S. Platt
Музафарабад, Кашмир
Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.
Фотографија: AFP/Getty Images/F. J. Brown
Л' Аквила- земјотрес и одговорност
Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.
Фотографија: picture-alliance/dpa
9 фотографии1 | 9
Земјотресите не се невообичаени во Авганистан и особено во планинскиот венец Хиндукуш. Штетата е често поразителна поради лошата градба на многу авганистански куќи. На ова се додава фактот дека хуманитарната ситуација во Авганистан е катастрофална како резултат на повлекувањето на западните трупи и преземањето на власта од страна на радикалните исламски талибанци во минатата година. Има недостиг од храна и лекови.
