Весникот „Њујорк Тајмс“ дојде до финалниот извештај на Истражната комисија на ОН за поморскиот инцидент. Извештајот на ОН кој првобитно требаше да биде завршен во февруари, треба официјално да биде објавен денеска. Во него уште се наведува дека Израел мора да се извини за своите постапки и на семејствата на загинатите да им исплати отштета.

Во нападот на израелските командоси на 31 мај 2010 година на флотата која превезуваше хуманитарна помош за Газа, беа убиени најмалку деветмина про-палестински активисти од турска националност. По овој инцидент сериозно беа заострени односите меѓу Анкара и Ерусалим.

Комисијата на ОН, која ја предводи поранешниот премиер на Нов Зеланд, Џефри Палмер, во извештајот наведува дека израелските командоси при упадот на бродот Мави Мармара се соочиле со „организиран и насилен отпор“.

„Меѓутоа, израелската одлука да се влезе во бродот со употреба на масивна сила, на голема оддалеченост од  зоната на блокада и без конечно предупредување пред упадот, била претерана и несразмерна“ , се заклучува во извештајот.

Автор: СН/ЕМФ/афп

Редактор: Борис Георгиевски