Во фокусот на разговорите на германскиот министер за надворешни работи Гидо Вестервеле во главниот град на Србија ќе биде спорот околу признавањето на независноста на Косово. Германскиот министер во Белград го очекуваат дефинитивно најтешките разговори за време на двоиполдневната турнеја. Тој ќе се обиде да ги убеди српските власти, ако не да се откажат, барем да ја ублажат резолуцијата за Косово, за која на 9 септември треба да гласа Генералното Собрание на ОН. Вестервеле во Белград меѓу другите треба да се сретне и со српскиот претседател Борис Тадиќ.

Денеска попладне шефот на германската дипломатија ќе продолжи кон Сараево. Главна тема со државното раководство на Босна и Херцеговина ќе биде блокадата на реформите во земјата, која трае веќе подолго време како и парламентарните и претседателски избори закажани за октомври. Западот се надева дека по нив на власт во земјата ќе дојдат политичари кои нивните постапки ќе ги насочуваат помалку кон етничките прашања отколку актуелните актери.

Земјите од ЈИЕ ќе најдат место под заедничкиот европски покрив

Како што беше најавено Вестервеле ја започна мини-балканската турнеја со оптимистичка порака за земјите од Балканот. Тој на првата станица во хрватскиот главен град Загреб истакна: „Сите земји од Југоисточна Европа, вклучително и Србија и Косово еден ден со сигурност ќе најдат место под заедничкиот европски покрив“, порача Вестервеле.

За Хрватска меѓутоа перспективата за членство во ЕУ е многу подофатлива: Хрватска би можела да стане 28 членка на Унијата веќе во наредната година доколку ги исполни сите услови во преговорите, порача синоќа германскиот министер за надворешни работиво Загреб. „Доколку Хрватска ги вложи сите сили во завршната фаза од преговорите влезот во ЕУ е можен уште наредната година“, порача Вестервеле. Хрватска, рече тој, и натаму ќе ја има поддршката на Германија. Вестервеле ги пофали резултатите на Загреб во борбата против корупцијата, но истакна дека претстои уште работа во реформите на правосудството.

Последна станица на балканската турнеја на германскиот министер за надворешни работи Гидо Вестервеле е Косово, кое ќе го посети утре.

Автор: СН/ БГ/ ард/ дпа

Редактор: Александра Трајковска