Израел се соочува со бран на осуда од меѓународните фактори поради усвоениот закон за дополнителна легализација на нелегални еврејски населби на палестински приватни имоти.
Фотографија: Reuters/B. Ratner
Реклама
Генералниот секретар на ОН, Антонио Гутереш, соопшти дека израелскиот закон за легализација на илјадници домови за еврејски жители изградени на приватна палестинска земја, го прекршува меѓународното право, предупредувајќи оти ќе има далекусежни правни последици за Израел.
Гутереш со тоа се придружи на низата осуди на усвојувањето на спорниот закон врз основа на кој ретроактивно се легализираа десетици диви еврејски населби.
„Генералнот секретар длабоко жали поради усвојувањето на т.н. Закон за регулирање на 6 февруари во Кнесетот. Тој наводно им обезбедува имунитет на населбите и пунктовите на окупираниот Западен Брег кои се изградени на палестинска земја во приватна сопственост“, се наведува во соопштението на ОН.
Антонио ГутерешФотографија: Reuters/P. Albouy
Во соопштението се додава дека генералниот секретар на ОН „инсистира на потребата да се избегне каква било акција која ќе го попречи решението за две држави“, односно за создавање на независна Палестина покрај Израел.
„Сите клучни прашања би требало да бидат решени меѓу страните преку директни преговори врз основа на релевантните резолуции на Советот на безбедност и на меѓународните договори. ОН се подготвени да го поддржат тој процес“, беше соопштено во светското тело.
Високата претставничка на ЕУ за надворешна политика и безбедност, Федерика Могерини, го повика во меѓувреме Израел да не го спроведува тој закон.
„ЕУ го осудува неодамешното усвојување на законот во Кнесетот, бидејќи тоа преминува нов и опасен праг на легализација на одземањето на палестинското право на сопственост и ефективно ја авторизира конфискацијата на палестинска земја во приватна сопственост на окупираните териториии“, наведено е во соопштението од Брисел, во кое се додава оти тој документ му овозможува на Израел да присвои уште повеќе палестинска земја на Западниот Брег.
Истотака се прецизира дека „законот може да обезбеди легализација на бројни населби и пунктови кои порано се сметани за нелегални, дури и врз основа на израелскиот закон, што е спротивно на поранешните обврски на израелската влада и е нелегално врз основа на меѓународното право.“
„Ако биде применет, законот уште повеќе ќе ја потврди реалноста на една држава на нееднакви права, постојана окупација и конфликт. ЕУ апелира до израелското раководство да се воздржи од примена на законот и да ги избегне мерките кои натамошно ја зголемуваат напнатоста и ги доведуваат во опасност можностите за мирно решавање на конфликтот“, се заклучува во соопштението.
Израелските населби на палестински територии
И покрај протестите и политичките предупредувања, израелскиот парламент донесе закон со кој се легализираат илегалните населби на палестинските територии. Критичарите велат дека тоа значи крај на решението „две држави“.
Фотографија: Reuters/B. Ratner
На палестинските територии има повеќе од 200 населби
Според податоците на организацијата за човекови права Бетселем, на Западниот брег и во Источен Ерусалим од 1967 до средината на 2013 година се изградени 125 официјални израелски населби и околу сто „диви населби“. Израелските власти, според Канцеларијата на ОН за хуманитарна помош (ОЦХА), за изградба на населби на палестински територии заплениле 35 проценти од површината на Источен Ерусалим.
Фотографија: Reuters/B. Ratner
Нема шанса за мир?
Во моментов еврејска населба се гради во Хар Хома, на Западниот брег, меѓу Ерусалим и Витлеем. Водечки претставници на Палестинците оценуваат дека израелската политика за градење населби го уништува решението „две држави“ и го спречува мирот со Палестинците. Изградбата на населбите на палестински територии е критикувана и во меѓународни рамки.
Фотографија: picture alliance/newscom/D. Hill
Израел конфискува палестински приватни имоти
Новиот закон за ретроактивно легализирање на станови на доселеници на Западниот брег и во Источен Ерусалим е спорен. Со него се погодени 16 населби. За еврејските доселеници да можат да останат каде што се, предвидена е финансиска отштета за Палестинците кои се сопственици на земјиштето.
Фотографија: Reuters/A. Awad
Уривање на Амона
Новиот израелски закон не важи за куќите на доселениците за кои веќе има судска одлука за уривање. Партијата на доселениците имаше намера со законот да спречи принудно расчистување на населбата Амона. Сепак, куќите на 40 семејства беа испразнети минатата недела, а само четири дена потоа се почна со уривање.
Фотографија: Getty Images/AFP/T. Coex
Барикади и безредија
Одлуката на израелскиот Врховен суд за уривање на Амона беше донесена уште на крајот на 2014 година. Рокот беше повеќепати одлаган. Десните групи и доселениците до крај се обидуваа да спречат евакуација и уништување на местото. Многумина доаѓаа од други места специјално за да демонстрираат. И на спротивната страна имаше насилни протести на Палестинците.
Фотографија: Reuters/M. Torokman
Ескалација при принудното иселување
Жителите на Амона веруваат дека Западниот брег, окупиран од страна на Израел од 1967 година, е дел од територијата која Бог во Библијата му ја наменил на еврејскиот народ. На Западниот брег и во Источен Ерусалим живеат околу 600.000 Израелци. Меѓу доселениците и Палестинците постојано има судири.
Фотографија: Reuters/M. Torokman
Нов дом
На приватни имоти на Палестинци спротивно на законот се изградени околу 4000 станови. Тие треба или да бидат испразнети, или со новиот закон треба да бидат ретроактивно легализирани. Многу од жителите на Амона имаат нов дом во соседните населби, како овде, во Офра.
Фотографија: Reuters/B. Ratner
Принудно иселување во Офра
Но и во Офра има нелегални куќи. До 5 март тука треба да бидат испразнети девет куќи кои се изградени на приватен имот на Палестинци. Куќата мора да ја напушти и семејството Бен Шушан.
