Полицијата вели дека засега нема индиции оти се работи за напад со исламистичка позадина. Еден од напаѓачите, снимен со аматерска камера пред да почне да пука во луѓето, на глас вели дека е Германец роден во Германија. Полицијата засега не може да ги потврди информациите дека еден од напаѓачите се самоубил.
Портпаролот Маркус Мартинс изјави дека тројца осомничени напаѓачи вооружени со пушки се во бегство и полицијата трага по нив. Владини извори велат дека можат да потврдат со сигурност само еден напаѓач.
Нападот се третира како „можен тероризам“. Од граѓаните се бара да останат во своите домови додека трае потрагата.

Во Минхен е прогласена вонредна состојба и терористичка опасност. Евакуирана е главната железничка станица, а метро и автобускиот превоз е во прекин.
Германската влада заседава на вонредна седница, а министерот за внатрешни работи го прекина годишниот одмор и се врати во земјата.

Американскиот и францускиот претседател Барак Обама и Франсоа Оланд понудија помош за справување со состојбата.

Минатата недела, малолетен напаѓач во воз кај Вирцбург нападна патници со секира. „Исламската држава“ подоцна соопшти дека напаѓачот бил нејзин член.