Отворете ги ушите, слушнете го народот!
16 февруари 2011„Ве предупредувам, отворете ги ушите пред да биде предоцна“, напиша денеска на својата интернет-страница Мехди Каруби, еден од водечките фигури на иранската опозиција. Тој од раководството во земјата бара да извлече поука од настаните во Тунис и Египет, каде „владетелите се оддалечиле од народот“. Мир Хосеин Мусави, пак, иранските протести од понеделникот (14.02.) ги оцени како „успех на народот“.
Во протестите на илјадници противници на режимот, во понеделникот во Техеран беа убиени две лица. Денеска, според иранските државни медиуми, дошло до насилства за време на комеморацијата за еден од загинатите студенти. Според наводи на државните медиуми, се судриле поддржувачи и противници на власта.
Парламентарци бараат смртна казна за опозиционите водачи
Денеска иранскиот режим повикува на демонстрации против опозицијата. Тие би требало да се одржат в петок (18.02), во Техеран. Вчера во иранскиот парламент околу 200 пратеници бараа смртна казна за Мусави и Каруби. Иранскиот претседател Махмуд Ахмадинеџад, пак, протестите на опозицијата ги оцени како „безизгледни“:
„Нема да постигнат ништо. Сакаат да фрлат сенка врз зрачењето на иранската нација, но сето тоа изгледа како да фрлаат прашина кон сонцето - прашината едноставно им се враќа во очите“, изјави Ахмадинеџад за иранската телевизија.
Денеска Каруби на својата веб-страница пишува дека не се плаши од закани и дека е подготвен да ја плати неопходната цена. „Наместо да се заканувате, треба да ги ослободите политичките затвореници, да не ги потиснувате луѓето, да дозволите слобода на печатот и да го почитувате уставот“, и` порачува Каруби на власта.
Иран е специфичен
Структурата на власта и општествените услови, како и напрегнатите односи на Иран со Западот, ја прават земјата и протестното движење посебен случај. Иднината на демократското движење сега е предмет на широка дебата. Според Мехран Барати, експерт за Иран кој живее во Берлин, иранските граѓански протести ќе продолжат се‘ додека не се издејствуваат политички реформи:
„Ова движење нема да запре. Иранците чекаа 30 години и сега времето е дојдено. Луѓето ги бараат своите права. Ако режимот не им ги дава тие права, тогаш движењето ќе продолжи, само не може да се предвиди времето - за 2 или 3 месеци, 6 месеци или две недели.“
Автор: ЕМФ/ТТ/дпа/афп/дв
Редактор: Жана Ацеска