Портпарол на американската амбасада потврди дека амбасадорот синоќа вечерта бил на разговор во Министерството за надворешни работи во Исламабад.

Во првата твит-порака во Новата година , американскиот претседател Доналд Трамп го зеде Пакистан на нишан,   обвинувајќи ја земјата дека им дава засолниште на терористи и најавувајќи намера за кратење на милијарди долари тешката американска помош. „САД на Пакистан во изминатите 15 години му дадоа помош од преку 33 милијарди долари, а Пакистан од своја страна не понуди ништо друго освен лаги и измами, сметајќи ги Американците за глупави“, критикуваше Трамп. „Тие им нудат прибежиште на терористите кои ние ги гониме во Авганистан. Повеќе нема да го има тоа!“, се закани Трамп.

Владата во Исламабад категорично ги отфрли обвинувањата на Трамп. Министерот за надворешни работи Каваја Асиф за ТВ Гео изјави дека американскиот претседател постојано на мета го има Пакистан, а во суштина станува збор за направените грешки на САД во Авганистан. Твитовите на Трамп против Пакистан всушност се наменети за домашната публика и имаат внатрешнополитичка цел.

Од стапувањето на Трамп на претседателската функција пред една година, и без тоа проблематичните односи помеѓу Вашингтон и Исламабад, бележат натамошно влошување. Американската влада во август на Конгресот му го соопшти размислувањето околу кратење на предвидената помош за Пакистан од 225 милиони долари, образложувајќи ја со недоволно стргиот пристап на Пакистан против екстремистите. И претходникот на Трамп, Барак Обама, го критикуваше ставот на Пакистан кон радикално исламистичките талибанци, против кои Вашингтон води борба од нападите на 11. септември 2001. година. Исламабад постојано ги отфрла критиките за  недоволна одлучност во сузбивањето на исламистите,  укажувајќи на високите издатоци од милијарди долари во борбата против екстремизмот.