Папата ја нагласи одговорноста на секој политичар за праведноста и за мирот. „Клучно мерило или причина за работата како политичар не смее да биде успехот, а уште помалку материјалната добивка“, рече папата. Успехот, според него, мора му биде подреден на мерилото за праведност. „Да му служи на правото и да се спротивставува на владеењето на неправото е и останува основна задача на политичарот“, истакна папата. Тој не се осврна директно на биоетичките дебати за истражувањата со матични клетки и за преимплантантна дијагностика, но нагласи дека од политичарите и научниците посебно се бара да ги преиспитаат своите решенија и од морален аспект. Бенедикт им оддаде признание на борците на отпорот против нацистичките и другите тоталитарни режими, а го пофали и еколошкото движење.

Ламерт побара надминување на поделбата на Црквата

Пред настапот на папата, претседателот на Бундестагот Норберт Ламерт, во поздравното обраќање, побара да и’ се стави крај на речиси петвековната поделба на црквата. Многу луѓе во Германија, не само ангажираните католици и протестанти, го сметаат опстојувањето на црковната поделба како повреда на нивните религиозни чувства, истакна Ламерс и побара токму во понтификатот на еден германски папа, прв по Реформацијата, не само да биде натамошно искажана определба за екумена, туку и да биде направен забележлив чекор за надминување на поделбата на црквата, рече Ламерс.

Тој укажа на одвоеноста на државата од црквата, како прогресивно цивилизациско постигнување.

Настапот на папата во Бундестагот е нарушување на тој, во уставот утврден принцип, сметаат десетици пратеници. Околу 80 пратеници го бојкотираа говорот на поглаварот на католичката црква.

За време на говорот на Бенедикт 16 во центарот на Берлин повеќе илјади луѓе демонстрираа против посетата на папата. Предвидено е протестна поворка да помине покрај споменикот на убиените хомосексуалци и лезбејки во вр емето на националсоцијализмот, како и покрај споменикот на холокаустот.

Автор: ЗЈ/ЖА/дпа/афп/ртре

Редактор: Жана Ацеска