Папата се повлекува
11 февруари 2013![](https://static.dw.com/image/16590499_800.webp)
Јозеф Рацингер својата одлука ја соопштил на Конзисториум (собрание на папата и кардиналите н.з.) вo Рим и тоа на латински јазик, што е невообичаено. „Папата најави дека ќе се повлече од функцијата на 28 февруари во 20 часот“, соопшти портпарол на Ватикан.
Обраќањето на папата пред кардиналите го пренесе агенцијата КНА. Во него Бенедикт Шеснаесетти, меѓу другото, вели: „Откако повеќепати ја преиспитував својата совест пред Господа, дојдов до сознание дека мојата сила, со оглед на староста која настапува, не е доволна за да ја извршувам должноста соодветно.“
Папата им се заблагодари на собраните на Конзисториумот од „се‘срце“ за „сета љубов и работа“ со која тие заедно со него го носеле товарот на функцијата и замоли за прошка за сите негови „грешки“.
Според најавите, папата по повлекувањето ќе замине прво во летната резиденција Кастел Гандолфо, а потоа ќе замине во манастир во Ватикан.
Бенедикт Шеснаесетти е на чело на Римокатоличката црква од април 2005 година. Тој го наследи починатиот Јован Павле Втори. Бенедикт во меѓувреме има полни 85 години. Ова е првпат со векови еден папа да се повлекува од функцијата.