На северот на Косово денеска е мирно. Локалното население останува на барикадите на повеќе патни правци во северниот регион, а силите на КФОР денеска не преземаат никакви акции за отстранување на блокадите.

Новата средба меѓу шефот на мисијата ЕУЛЕКС, Гзавије Марнак и претседателите на четирите општини од северот на Косово синоќа мина без решение. Марнак порача дека европската мисија во соработка со КФОР ќе продолжи да вложува напори за обезбедување слободно движење на сите граѓани. Претставниците на локалното српско население меѓутоа порачуваат дека блокадите на патните правци може да бидат отстранети само ако КФОР и ЕУЛЕКС се вратат кон статусната неутралност во нивната работа и од спорните гранични премини кон Србија, Јариње и Брњак, ги отстранат косовските цариници и погранични полицајци. Освен тоа Србите бараат возилата на КФОР да не ги транспортираат припадниците на косовските власти.

Упорно на барикадите

Локалното српско население опстојува на блокадите и покрај врнежливото време. Тие палат огнови кај барикадите, што се состојат од урнати балвани и камиони со камења и бдеат на смена. Кога ќе се огласат сирените за тревога, на дежурните им се приклучуваат сите мештани кои можат да се движат. Моментално се блокирани уште 16 локални патни правци во регионот населен претежно со српско население. Поради блокадите снабдувањето се одвива отежнато, по споредни патни правци, што е дополнително комплицирано и поради врнежливото време. Но, граѓаните нагласуваат дека се решени да истрајат, без оглед на околностите.

Решение од повисоко ниво

Претседателот на општината Звечан, Драгиша Миловиќ, порача дека на вечерашната средба со српскиот претседател Борис Тадиќ ќе побара решение за кризата од повиско ниво. Кризата на северот на Косово не можат да ја решаваат претседателите на општините, сега е на потег државниот врв на Србија, порача Миловиќ. Тој уште додаде дека тој и неговите колеги од другите три српски општини ќе го информираат претседателот Тадиќ за актуалната ситуација во кризниот регион и за преговорите со претставниците на КФОР и ЕУЛЕКС, кои треба да продолжат.

Автор: ГЧ/ЖА/дапд/бета

Редактор: Ж. Ацеска