Пендаровски: Засега нема потреба од вонредна состојба
БГ
16 март 2020
Советот за безбедност заклучил дека нема потреба од зголемувањето на нивото на мерките кои се преземаат против коронавирусот. Пендаровски не гледа проблем да се одложат изборите
Фотографија: Kabinett des Präsidenten von Nord-Mazedonien
Реклама
Советот за безбедност вечерва заклучи дека поставеноста на државата е соодветна, и адекватна на ризиците на кои е изложена од пандемијата на коронавирусот. Шефот на државата Стево Пендаровски по состанокот информираше дека засега нема потреба да се продлабочува или проширува кризната состојба која е прогласена во две општини поради Ковид-19.
„Не е потребно да избрзуваме со голо декларирање на некои состојби како вонредна или кризна состојба на цела територија, затоа што и според надлежниот министер за здравство тоа не е потребно во моментов“, рече Пендаровски.
Тој образложи дека за прогласување на вонредна состојба засега нема потреба, и второ, дека мора да се води сметка и за ограничените ресурси на државата, со оглед на проценката дека „кризата ќе трае“.
Пендаровски направи споредба и со состојбата во соседните држави во кои е веќе прогласена вонредна состојба и вели дека Северна Македонија во тој поглед прави дури и многу повеќе.
На сите присутни на состанокот кај Пендаровски им беше измерена температурата. Талат ЏафериФотографија: Kabinett des Präsidenten von Nord-Mazedonien
„Сосема е небитно како ќе ја наречеме состојбата. Ние ги надминуваме мерките кои се преземаат во околните држави кои веќе прогласија вонредна состојба.
Доколку се јави потреба, Владата може да го ограничи движењето на граѓаните и без прогласување вонредна состојба“, изјави Пендаровски.
Утре Пендаровски ќе им биде домаќин на политичките лидери на состанок на кој треба да се расправа за одложување на изборите на 12 април. Шефот на државата смета дека нема никакви пречки да се одложат изборите, а потсетува и дека мисијата на набљудувачите на ОБСЕ/ОДИХР веќе најави заминување од земјата.
Претседателот апелираше до сите граѓани да не патуваат надвор од земјата и да ги почитуваат препораките на надлежните. Но тој им порача и на македонските државјани кои живеат во странство, во овој период, да избегнат враќање во татковината.
Во изолација поради коронавирус? Нема проблем
Со малку креативност можете да ја претворите изолацијата во инспирација. Еве неколку идеи како да го искористите времето во карантин, и да продолжите нормално да живеете дури и затворени во четири ѕида.
Фотографија: picture-alliance/dpa/P. Schickert
Бидете креативни со конзервираната храна
Претворањето на конзервираната храна во нешто вкусно можеби бара малку магија, но сигурно не е невозможно. На пример, експериментирајте со лакса која ги прочистува синусите или пак измешајте конзерва туна со малку пченка и свеж ѓумбир за да го зајакнете вашиот имунолошки систем.
Фотографија: Miguel Medina/AFP/Getty Images
Затворената вежбална не е изговор
Имате доволно начини да ја одржите добрата форма на вашето тело дури и ако не можете да ја посетите вашата вежбална. Загрејте го телото со фитнес вежби или јога со онлајн упатства, а доколку ви е многу здодевно искористете ги и конзервите со храна во вашиот магацин за да ги развиете вашите бицепси и трицепси.
Фотографија: picture-alliance/dpa/K.-D. Gabbert
Време е за пролетно чистење
Искористете ја можноста, засукајте ги ракавите и употребете го вишокот енергија за да го светнете секое ќоше во домот. Ова може да биде најдобриот момент за расчитување на нередот. Можете дури и да ослободите место во плакарите и да зачистите во подрумот.
Целодневното гледање на ТВ серии е гарантиран начин за опуштање на умот и телото. Можеби мини-серијата „Чернобил“ и не е најдобриот избор доколку сте во мрачно расположение. Алтернативата би било нешто полесно, како „Пријатели“. Доколку секој ден потрошите 6 часа и 20 минути на оваа серија, ќе ги изгледате сите 236 епизоди за 14 дена.
Покрај сето слободно време можеби е добар момент да ја избришете прашината од некои постари игри и да се забавувате со оние со кои го споделувате карантинот. Доколку сте сами во изолација, повеќе класични игри денес имаат и онлајн верзии па можете да играте со пријателите преку интернет.
Фотографија: picture-alliance/dpa/S. Stache
Научете нешто ново
Во денешно време можете да научите речиси се онлајн. Можеби секогаш сте сакале да научите некоја нова вештина или дури и јазик. Германски можеби? На интернет ќе најдете многу можности и за бесплатно изучување јазици, па со оглед на слободното време, нема никаков изговор зошто тоа да не го сторите.
Фотографија: Colourbox
Јавете и се на бабата
Вашите роднини секогаш се жалат дека ве гледаат само за празници. Сега е добар момент да им се јавите. Иако веројатноста дека ќе заглавите на телефон 1-2 часа е голема, сепак ќе ви се израдуваат. Притоа, ќе покажете грижа и за нив и за нивното здравје во оваа тешка ситуација, особено за постарите луѓе.
Фотографија: Heike Brauer/Fotolia
Планирајте го следниот одмор
Планирањето одмор е добар начин да избегате од вашата соба, макар и само во мислите. Исполнете го денот замислувајќи си како се релаксирате на Бали или уживате во чистиот планински воздух некаде на Алпите. Само не заборавајте да си купите и патничко осигурување бидејќи никогаш не се знае кога ќе дојде следната криза.
