Пенс: САД се отворени за преговори со Северна Кореја
ЖА / агенции
12 февруари 2018
Американскиот заменик-претседател Мајк Пенс изјави дека САД се подготвени за преговори со Северна Кореја, но притисокот врз Пјонгјанг ќе биде натамошно зголемуван.
Фотографија: Getty Images/AFP/A. Messinis
Реклама
САД се подготвени да водат директни разговори со Северна Кореја, изјави американскиот вице-претседател Мајк Пенс во интервју за „Вашингтон пост“ по неговото враќање од Зимските олимписки игри, кои се одржуваат во Јужна Кореја. Но, Пенс истовремено јасно стави на знаење дека Вашингтон ќе продолжи преку санкции да врши максимален притисок врз изолираната азиска земја.
Пенс, кој при својата посета на Зимската олимпијада избегнуваше директен контакт со севернокорејски политичари, изјави дека притисокот врз севернокорејското раководство на чело со Ким Јонг Ун ќе биде константен сѐ додека тоа не преземе мерки, кои САД и Јужна Кореја ќе ги оценат за важни чекори на патот кон деескалација. „Политиката на максимален притисок и натаму останува, ќе биде дури и засилена. Но, ако од другата страна постои желба за разговори, ние ќе разговараме“, истакна Пенс. Неговата изјава претставува омекнување на досегашната политика на САД, која евентуалните преговори постојано ги условуваше со претходни отстапки од страна на Северна Кореја. Според Пенс, на средба со јужнокорејскиот претседател Мун Џае Ин бил постигнат единствен став дека почеток на преговори со Пјонгјанг нема да значи и олабавување на санкциите. Севернокорејскиот властодржец Ким Јонг Ун во саботата го покани Мун на заедничка средба на двете Кореи.
За што е способна севернокорејската армија?
Северна Кореја повторно го привлекува вниманието на светската јавност. Тестирањето на интерконтиненталните ракети наидува на остри критики. Земјата има една од најголемите армии во светот. Но, продолжува да се вооружува
Фотографија: Reuters/KCNA
Меѓу најбројните армии во светот
Севернокорејската армија има 700 илјади војници и околу 4,5 милиони резервисти. Речиси секој петти жител на земјата е во војска. Сите мажи во комунистичкиот режим мораат да учествуваат во воената обука. Поради тоа, Северна Кореја има двојно повеќе војници од соседната Јужна Кореја.
Фотографија: Getty Images/AFP/E. Jones
Различни воени орудија
Според податоците наведени во Глобалниот индекс за вооружување, Северна Кореја во 2017 година располага со 76 подморници, 5.025 тенкови и 458 борбени авиони. На оваа фотографија од 2013 година, лидерот Ким Јонг Ун е сликан во командната централа на армијата.
Фотографија: picture-alliance/dpa
Воена парада
Севернокорејскиот режим секоја година ја демонстрира својата сила на воена парада во главниот град Пјонгјанг. Парадите воглавно се одржуваат за време на некој важен јубилеј на комунистичката земја или семејството Ким.
Фотографија: picture-alliance/dpa/KCNA
Интерконтинентални ракети
САД во четвртокот потврдија дека Северна Кореја успешно тестирала балистичка интерконтинентална ракета. Ракетата од типот „Хвасонг- 14“ е во состојба да ја погоди секоја цел во светот, јави државната новинска агенција КЦНА.
Фотографија: Getty Images/AFP/KCNA
Атомските проби продолжуваат
И покрај острите санкции, Северна Кореја продолжува со својата атомска програма. Само во 2016 година беа извршени пет нуклеарни проби. Јужнокорејскиот министер за одбрана Хан Мин Ко смета дека соседот наскоро ќе го изврши и шестиот тест.
Фотографија: picture-alliance/dpa/KCNA
Закана за светскиот мир
Кина и Русија се единствените земји кои се водат како сојузници на Северна Кореја. Режимот за главен непријател ја смета „империјалистичката сила САД“. Меѓу непријателите уште спаѓаат и Јужна Кореја и Јапонија.
Фотографија: Reuters/K. Hong-Ji
Крај на трпението?
По тестирањето на интерконтиненталните ракети на американското трпение му дојде крајот. Претседателот на САД, Доналд Трамп сака да најде решение со своите сојузници од Г20. Кина и Русија, во секој случај, сакаат да спречат американски напади врз воени цели во Северна Кореја.
