Коалицијата „Европска Црна Гора“ ќе има апсолутно мнозинство во парламентот, иако уште не е јасно колку пратеници ќе има во него. Проекциите одат од 46 до 49. Во црногорскиот парламент има вкупно 81 пратеник. Според проекциите, втора по сила ќе биде фракцијата на Социјалистичката народна партија со 16 пратеници, Новата српска демократија ќе биде застапена со 8, Движењето за промени со пет, четирите партии на етничките Албанци секоја со по еден пратеник. Од резултатот на Коалицијата за народот, која веројатно го исполни цензусот да биде застапена во парламентот, зависи и бројот на пратеничките места на победничкаtа коалиција.

Многуте партии беа хендикеп за опозицијата

Карактеристика на изборите е што гласовите се поделени во широк спектар од партии, со што всушност е хендикепирана опозицијата, оти гласовите на партиите што не влегоа во парламентот, според законската регулатива, и’ се припишуваат на победничката партија.

Обраќајќи им се на приврзениците, кои се собраа пред седиштето на владата и го скандираа неговото име, досегашниот и иден шеф на владата Мило Ѓукановиќ рече дека граѓаните, давајќи го својот глас за неговата коалиција, дале глас за сигурен живот, европска иднина и економски просперитет.

„Затоа, ќе сториме се’, за многу бргу да формираме одговорна и компетентна влада која ќе биде во состојба квалитетно, компетентно и ефикасно да се позанимава со проблемите на економски и демократки план, која ќе успее и натаму многу ефикасно и многу сигурно да ги води економските и демократски реформи и Црна Гора многу забрзано да ја приближува кон нашите европски и евроатлантски цели“, рече Мило Ѓукановиќ.

Најголем пад на изборите забележа Движењето за промена, кое загуби шест мандати. Неговиот лидер Небојша Медоевиќ рече дека изборите покажале оти 20 години по падот на Берлинскиот ѕид треба храброст, за да се гласа за политичка партија која не се согласува Црна Гора да биде „држава во рацете на неколкумина друмски разбојници“.

Автор: Зоран Јордановски

Редактор: Елизабета Милошевска Фиданоска