Брзото возење или погрешното паркирање во иднина ќе чинат речиси двојно поскапо во Германија. По долги дебати меѓу Берлин и сојузните покраини беше постигнат консензус на оваа тема кој сега ќе се ефектуира во пракса. На пример, возењето со поголема брзина ќе чини двојно поскапо: оној кој вози со 16-20 км/ч над дозволеното ќе биде казнет со 70 евра - наместо досегашните 35. Оној кој дополнително ќе претера и ќе вози со 91 километар над дозволената брзина, ќе плаќа 400 наместо досегашните 200 евра казна.
Казната за паркирање на недозволено место е исто така повеќекратно зголемена во однос на досегашната која изнесуваше 15 евра. Доколку паркирате на место за лице со хендикеп можете да очекувате глоба од 55 евра, наместо 35. Доколку попречите влез или излез на јавен превоз, полиција или пожарникари, ќе бидете казнети со 100 евра. Воведена е и една нова казна: недозволено паркирање на место за електро-автомобили или за споделени автомобили- и таа изнесува 55 евра. 
Доколку на автопат не учествувате во формирање на ткн. лента за спасување за време на некој инцидент или доколку истата ја злоупотребувате, ќе платите казна од 320 евра и ќе останете без возачка дозвола еден месец. Досега, казната за тој прекршок беше 200 евра.  
Доколку со возилото навлезете во лентата за велосипедисти, на тротоар или во лента за итни случаи, наместо досегашните 25, ќе треба да платите 100 евра казна. 
И конечно: оние учесници во сообраќајот кои предизвикуваат непотребна бучава и исфрлаат многу штетни гасови кои би можеле да бидат спречени, како и оние кои демонстративно и ненужно возат напред-назад, ќе бидат казнети со 100 евра, наместо со сегашните 20 евра. 

Незадоволни велосипедисти 

Новата казнена политика влегува во сила на крајот на октомври. Дотогаш, и граѓаните и властите ќе можат да се подготват за нив. Но велосипедистите се незадоволни. Според Германскиот сојуз на клубовите на велосипедисти, новите повисоки казни се уште ја одржуваат привилегираната позиција на автомобилите и им пречат на општините да изградат повеќе улици наменети за велосипедисти. 
„Тоа треба да се смени“, велат од Сојузот. „Општините треба да можат без пречки да воведат максимална брзина од 30 километри на час, како и да изградат посоодветни ленти за велосипедистите со кои ќе се заштитат луѓето кои возат велосипед“, вели портпаролката на Сојузот, Штефани Кроне.