Во Италија денеска се одржа државен погреб за поголемиот број жртви кои настрадаа во уривањето на мостот во Џенова. Бројот на загинати пак порасна на 41.
Фотографија: Reuters/S. Rellandini
Реклама
Загинатите во уривањето на надвозникот во Џенова, беа погребани во тој италијански град во присуство на највисоки државни функционери и бројни граѓани. Претседателот на Италија Серџо Матарела кратко поразговара со членовите на семејствата на жртвите, а присутни на погребот беа и премиерот Џузепе Конте, лидерите на владејачките партии, Луиџи ди Мајо и Матео Салвини, како и повеќе министри.
Семејствата на некои од жртвите одлучија да не учествуваат на церемонијата Некои од нив наведоа дека сакаат да ги погребаат своите најблиски во поинтимна атмосфера, додека пак други наведоа дека ја бојкотираат церемонијата. таткото на една од жртвите, истакна дека неговиот син е „убиен“ и за одговорна ја означи државата.
Од настраданите се простија и фудбалските тимови Сампдорија и Џенова, кои исто така нема да ги играат натпреварите од првото коло на Серија А за време на викендот. Играчите на останатите тимови пак мечевите ќе ги започна со минута молчење и ќе носат црни ленти на ракавите. Денеска во Италија прогласен е ден на жалост за жртвите во катастрофата на вијадуктот на автопатот А10 во Џенова.
Размерите на катастрофата во Џенова
01:35
This browser does not support the video element.
Инаку, според италијанските медиуми, спасувачките екипи ги пронашле речиси сите жртви од катастрофата. Синоќа, имено, биле пронајдени 3 лица под урнатините на мостот Моранди. Како што објави агенцијата АНСА, пожарникарите потврдиле дека пронашле тела на деветгодишно девојче и нејзините родители во „целосно уништен автомобил“ со кој патувале. Градоначалникот на Џенова, Клементе Мастела, во петокот нареди затворање на друг мост дизајниран од истиот архитект како и мостот кој се урна, со образложение оти за корисниците на надвозникот е подобро „да имаат непријатност отколку проблем“.
Мостови и објекти кои се урнаа
Мостовите се спектакуларни градби. Но, тие може да предизвикаат и драматични катастрофи. Конструкции во мизерна состојба има секаде во светот. Нивното уривање чини многу животи.
Фотографија: picture-alliance/C. Contreras
Мостот Чирахара, Колумбија
Мостот Чирахара требаше да поврзува два тунела. Но, кога во јануари 2018 година требаше да се поврзат два дела од мостот, се случи несреќа. Се урна еден од столбовите. Загинаа девет лица. Причина за уривањето беше грешка во конструкцијата. Од истата причина беше акутно загрозен од уривање и друг дел од мостот. Затоа мостот беше урнат со експлозив во јули 2018.
Фотографија: picture-alliance/C. Contreras
Мостот Студенка, Чешка
Кога се урна на 8 август 2008 година, работниците само што имаа почнато со санација на мостот Студенка. Во моментот на уривањето еден воз беше упатен во насока на градилиштето. Машиновозачот се обидел да кочи, но било предоцна. Возот се втурна во урнатините со брзина од 120 км на час. Сѐ уште до крај не е разјаснето зошто се урна мостот, но познато е дека конструкцијата имала повеќе недостатоци.
Фотографија: picture-alliance/dpa/V. Galgonek
Мостот Мисисипи, САД
Мостот долг 581 метри поврзуваше два кварта на Минеаполис. Автомобилите возеа по осум ленти над реката Мисисипи. Неколку дена пред уривањето на мостот почна негова санација. Слободна беше само една лента. Сепак, уривањето на мостот среде сообраќаен шпиц, на 1 август 2007 година, однесе 13 човечки животи. Причина за уривањето - грешка во контрукцијата.
Фотографија: picture-alliance/dpa/L. Smith
Зградата Сампун, Јужна Кореја
Зградата Сампун во Сеул се урна за само неколку секунди. Во уривањето на стоковната куќа, на 29 јуни 1995 година, животот го загубија над 500 лица. Причина: не се почитувале градежни прописи, конструкцијата не била добра и се применувале несоодветни градежни материјали.
Фотографија: picture-alliance/Yonhap
Зградата Рана Плаза, Бангладеш
Една од најголемите трагедии е уривањето на осумкатницата „Рана Плаза“ во Бангладеш, на 24 април 2013 година, кога животот го загубија 1135 луѓе. Само еден ден претходно било утврдено дека зградата има пукнатини, а полицијата забранила пристап до објектот. Но, до тоа се држеле малкумина. Во уривањето загинаа пред сѐ текстилни работнички од фабрика сместена во објектот.
